Ozarbayjon mudofaa vazirining o‘rinbosari Kerim Veliyev Armaniston bilan chegarada sodir bo‘lgan otishma oqibatida mamlakatning ikki nafar yuqori mansabdagi harbiylari halok bo‘lganini ma’lum qildi. Bu haqda “Vesti.az” nashri xabar tarqatgan.
“Bugun tongda general-mayor Po‘lat Gashimov, polkovnik Ilgar Mirzayev qahramonlarcha halok bo‘ldi”, — degan Veliyev.
Ayni vaqtda chegaradagi harbiy harakatlar davom etmoqda.
“Afsuski janglar yo‘qotishlarsiz bo‘lmaydi. Mudofaa vazirligi rahbariyati nomidan harbiylarning vafoti munosabati bilan ularning oila a’zolariga chuqur hamdardlik izhor etaman. Ishontirib aytamanki, bizning shahid ketgan o‘g‘lonlarimiz va yaralangan askarlar uchun, albatta, qasos olinadi”, — deya ta’kidlagan vazir o‘rinbosari.
Ikki davlat qo‘shinlari o‘rtasidagi to‘qnashuv Ozarbayjon shimoli-g‘arbidagi Tovuz viloyati hududida 12-iyulda sodir bo‘lgan. Ozarbayjon Mudofaa vazirligi Armanistonni o‘t ochish haqidagi ahdlashuvni qo‘pol ravishda buzganlik va mamlakat artilleriyasi joylashgan pozitsiyaga hujum qilganlikda ayblamoqda. Idora bergan ma’lumotga asosan, ikkala tomonda ham jang qurbonlari bor.
Armaniston Mudofaa vazirligi esa Ozarbayjon askarlarining guruhi “UAZ”da hech bir sababsiz mamlakat chegarasini buzib kirishga uringanini aytmoqda. Ogohlantirish tarzidagi o‘t ochilganidan keyin harbiylar avtomobilni tashlab, o‘z pozitsiyasiga qaytgan, biroq keyinchalik artilleriya hujumini uyushtirgan va tayanch punktini egallashga uringan. Vazirlik axboroti bo‘yicha arman qismi talafot ko‘rmagan, Ozarbayjon tomonida qurbonlar bo‘lgan.
13-iyulda ikkala tomon ham bir-biriga takroriy tarzda yana o‘t ochgan. Armaniston mudofaa vazirligi matbuot kotibi Shushan Stepanyanning aytishicha, ikki yoki uch soat davom etgan tanaffusdan keyin ozarbayjonlik harbiylar yana hujumga o‘tgan va bunga munosib javob qaytarilgan. Rasmiy Boku bergan ma’lumotga ko‘ra, Ozarbayjon artilleriyasi, minomyotlari va tanklari arman tayanch punktini vayron qilgan, harbiy texnikani buzgan va askarlarni ham halok etgan.
Rossiya Tashqi ishlar vazirligi mazkur nizoning boshlanishi yaxshi oqibatlarga olib kelmasligini bildirib, ikkala mamlakat hukumatlaridan o‘t ochish rejimini buzmaslikni so‘ragan. Vazirlik rasmiysi vaziyatni barqarorlashtirish yuzasidan ko‘mak berishga tayyorligini qayd etgan.
Yevroittifoq ham qurolli to‘qnashuvlarga barham berishni so‘ragan.
“Bu o‘t ochish rejimining jiddiy tarzda buzilishi va Yevropada xavfsizlik va hamkorlik tashkiloti sharoit o‘nglanganidan keyin bu borada tegishli monitoringni qayta o‘tkazishi lozim”, — deyiladi Yevropa tashqi siyosat xizmatining bayonotida.
BMT bosh kotibi Antoniu Gutterish Armaniston va Ozarbayjondan zudlik bilan harbiy harakatlarni to‘xtatishni talab qilgan.
Ikki respublika o‘rtasidagi nizolar Sovet Ittifoqi davlati parchalanganidan keyin boshlangan. Tortishuvlarga Tog‘li Qorabog‘ hududi sabab bo‘lgan, u yerda asosan armanlar yashaydi va 1991-yilda hudud Bokudan mustaqil ekanini e’lon qilgan. 1992—1994-yillarda Ozarbayjon ushbu hududni qaytarishga uringan, biroq yakunda ikki tomon o‘t ochmaslik haqida ahdlashuv tuzgan va u avval ham bir necha marta shu yo‘sinda buzilgan.
Izoh (0)