Liviya parlamenti Misrga mamlakatdagi mojaroga aralashishga ruxsat berdi

Liviya parlamenti — mamlakat sharqidagi Tobruk shahrida joylashgan Vakillar palatasi Misr qurolli kuchlariga Liviya mojarosiga aralashishga ruxsat berdi. “RIA Novosti”ning xabar berishicha, bu haqda Xalifa Xaftar Liviya milliy armiyasi (LMA) bilan hamkorlik qiluvchi qonun chiqaruvchi organ saytidagi bayonotda aytilgan.

“Biz ikki qardosh xalqlar, Liviya va Misrni bosqinchilar ustidan g‘alaba qozonish va mamlakatimiz va mintaqamizda umumiy xavfsizlik va barqarorlikni saqlash uchun birgalikda harakat qilishga chaqiramiz”, — deyiladi bayonotda. Vakillar palatasi, Misr tomoni “ikki mamlakat xavfsizligiga tahdid solayotganini” ko‘rsa, mojaroga aralashishi lozim, deb hisoblaydi.

Liviya parlamenti, shuningdek, mamlakatga Turkiya tomonidan aralashuv bo‘layotgani va Liviya suvereniteti g‘arbni nazorat qiluvchi qurolli guruhlar va ular bo‘ysunadigan amaldagi hokimiyatning marhamati bilan buzilayotganini bildirdi.

Eslatib o‘tamiz, Liviyada uzoq vaqtdan beri ikkita ijro hukumati parallel ravishda faoliyat ko‘rsatmoqda: BMT tomonidan tan olingan va Tripolida joylashgan milliy kelishuv hukumati hamda Xalifa Xaftarning Liviya milliy armiyasi tomonidan qo‘llab-quvvatlanuvchi mamlakat sharqida joylashgan Abdulla Abdurahmon at-Tanining vaqtinchalik mahkamasi. Ular o‘rtasidagi qarama-qarshilik 2011-yildan beri davom etib kelmoqda.

2019-yildan buyon Xalifa Xaftar kuchlari mamlakat poytaxti Tripoli ustidan hukmronlikni egallashga harakat qilmoqda. Ushbu mojaroda Misr BAA bilan bir qatorda Xaftarni qo‘llab-quvvatlamoqda, Turkiya esa milliy kelishuv hukumati tomonda bo‘lib, Tripoli hukumatiga moddiy-texnik yordam va harbiy mutaxassislarni yubormoqda.