Xitoyning Xiaomi kompaniyasi nostandart dizaynga ega Qin AI Life bolalar telefonini taqdim etdi. Mazkur yangi telefon 2—7 yosh oralig‘idagi bolalar uchun mo‘ljallangan, deb xabar beradi “Hi-Tech.Mail.ru”.
Qurilmada ko‘pchilik o‘rgangan raqamli klavishlar va boshqa boshqaruv organlari yo‘q, buning o‘rniga kichkina xoch va ikkita — “Ok” hamda “Orqaga” tugmalari o‘rin olgan. Ixtirochilar bolalar telefoni uchun boshqacha yo‘l tutishga qaror qilgan, u ovozli boshqaruvga mo‘ljallangan.
Qin AI Life telefonini bolalar ovozli buyruqlar yordamida boshqaradi, bu yerda odatdagidek “qo‘ng‘iroqlar” va SMS-xabarlar kerak emas. Buning o‘rniga standart messenjer o‘rnatilgan bo‘lib, bolaning ota-onasi birgalikda ovozli xabar almashish uchun o‘zlari va boshqalarni qo‘shish mumkin.
Mazkur telefon yordamida ota-ona tomonidan belgilangan raqamlarga qo‘ng‘iroq qilish mumkin, shuningdek, boshqa nomerlarni taqiqlab qo‘yish imkoniyati ham bor. Butun interfeys hali yaxshi o‘qishni bilmaydigan bolalar ham foydalanishi uchun qulay qilib ishlangan.
Ota-onalar o‘zlarining smartfonlari orqali bolaning telefoniga turli vazifa va savollar yuborishlari, shuningdek, uni Wi-Fi ulashi yoki cheklashi, “budilnik” vaqtini belgilashlari mumkin. Bundan tashqari, telefondagi GPS orqali bolaning harakatini kuzatsa bo‘ladi.
Qin AI Life klassik tugmali telefonga o‘xshaydi. Unga 1,54 dyuymli rangli displey va sig‘imi 1150 mA/soatga teng akkumulyator o‘rnatilgan. Shuningdek, telefon virtual eSIM’ni qo‘llab-quvvatlaydi.
Youpin kraudfanding maydonchasida ushbu bolalar telefonini 399 yuanga (57 dollar) buyurtma qilish mumkin. Qurilma jamlanmasidan quvvatlantirgich hamda maxsus tasma o‘rin olgan.
Avvalroq Xiaomi yangi noodatiy smartfon yaratish ustida ish boshlagani to‘g‘risida xabar berilgandi.
Izoh (0)