Farg‘ona viloyati hokimi Shuhrat G‘aniyev viloyatda takroriy ekinlar holati bilan tanishish chog‘ida o‘z tomorqasida rediska, bulg‘ori, qalampir ekishini va tomorqasidan bir yilda kamida to‘rt marta hosil olishini ma’lum qildi.
Viloyat hokimining qayd etishicha, ilgari takroriy ekin ekkan kishi jinoyatchi bo‘lardi. Odamlar yashirincha dala uvatlariga qo‘shimcha ekinlar ekardi. Uning so‘zlariga ko‘ra, hozirda vaziyat umuman o‘zgardi, g‘alladan bo‘shagan va foydalanishdan chiqqan yerlar qayta o‘zlashtirilib, kam daromadli, ehtiyojmand oilalarga bo‘lib berilmoqda.
“O‘zim erta bahorda tomorqamizdagi bir sotix yerga plyonka ostiga rediska ekaman. Uni sotib, shu yerda bulg‘ori yetishtirdim. Hozir uchinchi ekin — qalampir bor. Bir yilda kamida to‘rt marta hosil olamiz”, — dedi Shuhrat G‘aniyev.
Viloyat hokimligining xabar berishicha, Farg‘ona viloyatining barcha tumanlarida g‘alladan bo‘shagan maydonlarda yetishtirilayotgan ekinlar nazoratdan o‘tkazilmoqda, zarur holatda agrotexnik yordam ko‘rsatilmoqda. Ayni chog‘da bo‘sh qolgan yerlar yoshlar va kam ta’minlangan oilalarga biriktirilishi davom etmoqda.
Ta’kidlanishicha, 2020-yilda qishloq xo‘jaligi sohasidagi mavjud imkoniyatlar ishga solinib, viloyatda 18 ming oila kambag‘allikdan chiqariladi.
Mart oyida 5,5 gektar yer maydonida yoshlarning malinachilik kooperatsiyasi tashkil qilindi. Ayni kunlarda ular malina bilan birga, g‘alladan bo‘shagan maydonda mosh, loviya parvarishini ham olib bormoqda. Shuhrat G‘aniyev mazkur kooperatsiyada bo‘lib, ish jarayoni bilan tanishdi.
“Bir sotix yerdan 3-4 million so‘mgacha daromad olish mumkin. Mazkur ajratilgan yerlar uchun hech qanday soliq, ijara to‘lovi yo‘q”, — dedi viloyat rahbari.
Mavzuga doir:
- “U va u kabi rahbarlar jaydari, qo‘pol, lekin juda mehnatsevar”. Deputat Doniyor G‘aniyev amakisi — Farg‘ona viloyati hokimi haqida
- Farg‘ona viloyati hokimi Shuhrat G‘aniyev ba’zi otalar qizlarini erta turmushga berayotganini tanqid qildi
- Shuhrat G‘aniyev viloyat hokimi sifatida pora olmaganini ma’lum qildi
Izoh (0)