Qozog‘istonda koronavirusdan vafot etganlarni xotirlash maqsadida bir daqiqalik sukut e’lon qilinadi

Qozog‘istonda 13-iyul – Milliy motam kunida butun mamlakat bo‘ylab bir daqiqalik sukut e’lon qilinadi, deb xabar beradi Tengrinews.

“13-iyul — Milliy motam kuni, koronavirus pandemiyasi qurboniga aylangan fuqarolar xotirasiga butun mamlakat bo‘ylab Nur-Sulton vaqti bilan soat 12:00 da bir daqiqalik sukut e’lon qilinadi”, – deb yozdi prezident maslahatchisi Erlan Karin Telegram kanalida.

Eslatib o‘tamiz, Qozog‘istonda 13-iyul — koronavirus infeksiyasidan vafot etgan fuqarolar xotirasi uchun motam kuni deb e’lon qildi.

Avvalroq Qozog‘iston prezidenti mamlakatda koronavirusning ikkinchi to‘lqini boshlanishida Sog‘liqni saqlash vazirligini ayblagan edi.

So‘nggi ma’lumotlarga ko‘ra, mamlakatda koronavirusga chalinganlar soni 58 253 kishiga yetgan. Hozirga qadar 33 814 kishi sog‘aygan, 280 kishi virus qurboniga aylangan.