Jahon banki O‘zbekistonga 500 mln dollar qarz beradi. Mablag‘ qishloq xo‘jaligini modernizatsiya qilish uchun yo‘naltiriladi

O‘zbekiston hukumati va Jahon banki mamlakat qishloq xo‘jaligini modernizatsiya qilish loyihasini amalga oshirish uchun umumiy qiymati 500 million dollarlik qarz bitimini imzoladi, deya xabar berdi Investitsiyalar va tashqi savdo vazirligi.

O‘zbekiston tomonidan bitimni bosh vazirning o‘rinbosari — investitsiyalar va tashqi savdo vaziri Sardor Umrzoqov va Jahon banki tomonidan Markaziy Osiyo bo‘yicha mintaqaviy direktor Liliya Burunchuk imzoladi.

Imzolash marosimida Jahon bankining O‘zbekistondagi vakolatxonasi rahbari Marko Mantovanelli, O‘zbekiston Respublikasi qishloq xo‘jaligi vaziri Jamshid Xo‘jayev hamda Bank va tegishli idoralarning boshqa vakillari ishtirok etdi.

Loyiha Xalqaro tiklanish va taraqqiyot banki hamda Xalqaro taraqqiyot uyushmasi tomonidan tegishli ravishda 276 million dollar va 224 million dollar miqdorida moliyalashtiriladi.

Qayd etilishicha, 2017-yildan boshlab qishloq xo‘jaligi sohasidagi o‘zgarishlar O‘zbekiston hukumatining keng islohotlar dasturining muhim qismiga aylandi. Ushbu islohotlarning maqsadi — qishloq xo‘jaligidagi paxta va bug‘doy ulushini kamaytirish va yuqori qo‘shimcha qiymatga ega mahsulotlarni, shu jumladan, meva-sabzavot va chorvachilik mahsulotlarini ishlab chiqarish hajmini oshirish maqsadida sohada mehnat unumdorligini oshirish, qishloq xo‘jaligi mahsuloti eksportini ko‘paytirish, tarmoqni yanada modernizatsiya qilish va ishlab chiqarishni diversifikatsiya qilishdir.

Umrzoqovning ta’kidlashicha, qishloq xo‘jaligidagi islohotlar qishloq joylarida ko‘proq haq to‘lanadigan ish o‘rinlarining yaratilishiga, mamlakatning oziq-ovqat xavfsizligining mustahkamlanishiga va O‘zbekiston fermerlari va agrosanoat korxonalarining eksport daromadlarining o‘sishiga imkon beradi. Jahon banki tomonidan moliyalashtirilayotgan yangi loyiha qishloq xo‘jaligini bozor va raqobatbardosh tarmoqqa aylantirishga hissa qo‘shadi, shuningdek, qishloq xo‘jaligi ishlab chiqaruvchilariga davlat xizmatlari taqdim etilishini sezilarli darajada yaxshilaydi.

Ta’kidlanishicha, loyiha tufayli O‘zbekistonning barcha mintaqalaridagi fermerlar va agro-korxonalar vakillari uchun zamonaviy texnologiyalar, texnik maslahatlar, ishlab chiqarish, agrologistika, fitosanitariyaning turli bosqichlarida qo‘llab-quvvatlash xizmatlaridan, shuningdek, savdo hajmini oshirish uchun zarur axborot manbalaridan foydalanish imkoniyati yaratiladi. Natijada mahalliy ishlab chiqaruvchilarning raqobatbardoshligi va eksport salohiyatining o‘sishi hisobiga ularning ichki va xalqaro bozorlarda ishtiroki kengayadi.

Shuningdek, loyihada mahalliy tijorat banklarining ishtiroki tufayli mahalliy ishlab chiqaruvchilar intensiv bog‘dorchilikni rivojlantirish, issiqxona xo‘jaliklarini tashkil etish hamda mahsulotlarni saqlash, qadoqlash va qayta ishlash quvvatlarini yaratish, shuningdek, energetik va suvni tejaydigan texnologiyalar va qishloq xo‘jaligi texnikalarini sotib olishni nazarda tutgan holda eksportga yo‘naltirilgan qo‘shimcha qiymat zanjirlarini ko‘paytirish uchun ulardan foydalanish istiqbollari bilan uzoq muddatli kredit resurslarini jalb qilish imkoniyatiga ega bo‘ladi.

Shu bilan birga, loyiha O‘zbekistondagi qishloq xo‘jaligi ilmiy-tadqiqot institutlarini modernizatsiya qilish, amaliy tadqiqotlarni o‘tkazish va tarmoqqa ilg‘or ishlanmalarni joriy etishga yordam beradi. Loyiha tadbirlari urug‘chilikni rivojlantirish, yer va suv resurslarini boshqarish, muayyan hududlarga mo‘ljallangan agroekologik iqlimga chidamli texnologiyalarni joriy etish, shuningdek, O‘zbekistondagi o‘simliklarning noyob genetik materiallarini saqlash masalalariga qaratilgan bo‘ladi.

Vazirlik xabarida qayd etilishicha, 2017-yilda O‘zbekistonda islohotlar boshlanishi bilan Jahon bankining moliyaviy va texnik yordami sezilarli darajada oshdi. Bugungi kunda tashkilotning umumiy qiymati 4,4 milliard AQSh dollariga teng 23 ta loyihadan iborat bo‘lgan O‘zbekiston bo‘yicha dasturi Turkiyadan keyin Yevropa va Markaziy Osiyo mintaqasidagi eng yirik dastur hisoblanadi. Bank hukumatga turli sohalarda, jumladan, iqtisodiy islohotlarni amalga oshirish, qishloq xo‘jaligi, sog‘liqni saqlash, ta’lim tizimlarini, suv ta’minoti, energetika, transport, ijtimoiy himoya, shahar va qishloq infratuzilmasini rivojlantirish, shuningdek, koronavirus pandemiyasining sog‘liqni saqlash tizimiga, iqtisodiyot va aholi farovonligiga salbiy ta’sirini yumshatish bo‘yicha inqirozga qarshi dasturni amalga oshirishda muhim yordam ko‘rsatmoqda.