2019-yilning 10-may kuni Jinoyat kodeksining 168-moddasi (Firibgarlik) bilan ayblanib, qo‘lga olingan Said-Abdulaziz Yusupov 8-iyul, chorshanba kuni qamoqdan ozod etildi, deb xabar beradi “Kun.uz”.
Yusupovning advokati Arslon Shaymardonovning ma’lum qilishicha, mijozi yetkazilgan zararni qoplagani uchun ozodlikka chiqarilgan.
Bosh prokuratura rasmiy bayonotiga ko‘ra, Said-Abdulaziz Yusupov o‘zini Davlat xavfsizlik xizmati mas’ul xodimi deb tanishtirib, firibgarlik yo‘li bilan odamlardan juda katta miqdorda pul olganlikda ayblangan.
Qo‘lga olinishidan ikki kun o‘tib Yusupovning 2018-yili 25-sentabrda yozib olingan videomurojaati paydo bo‘lgan, videomurojaatda u jinoyat ishi soxtalashtirilganini iddao qilgan edi. Bosh prokuror o‘rinbosari Erkin Yo‘ldoshev 2019-yil 14-iyun kuni AOKAda bo‘lib o‘tgan matbuot anjumanida Yusupovning ishi nazoratda ekanini ma’lum qilgandi.
2019-yilning sentabrida Jinoyat ishlari bo‘yicha Yashnobod tumani sudida Said-Abdulaziz Yusupovga nisbatan jinoyat ishini ko‘rib chiqish bo‘yicha yopiq sud bo‘lib o‘tgandi.
Ma’lumot uchun, Said-Abdulaziz Yusupov 1982-yilda Navoiy viloyatida tug‘ilgan, millati — o‘zbek, O‘zbekiston fuqarosi, ma’lumoti — oliy, oilali, qo‘lga olingunga qadar O‘zbekiston mustaqil bosma ommaviy axborot vositalari va axborot agentliklarini qo‘llab-quvvatlash va rivojlantirish jamoat fondi direktori vazifasini bajaruvchi bo‘lib ishlagan.
Said-Abdulaziz Yusupov OAVlardagi bir qator maqolalari va video chiqishlari bilan tanilgan edi. Xususan, uning uchta FFF nazariyasi haqidagi chiqishi shov-shuvlarga sabab bo‘lgandi.
Ayni paytda Yusupov rahbarlik qilgan jamoat fondi faoliyat ko‘rsatmayotgani aytiladi.
Izoh (0)