COVID-19’ga qarshi “Koronavir” preparati Rossiya Sog‘liqni saqlash vazirligining xulosasini oldi. Dori vositasi “R-Farm” kompaniyasi tomonidan ishlab chiqilgan, deb yozmoqda “RIA Novosti”.
Bu Rossiyada koronavirus infeksiyasini davolashda qo‘llanilayotgan uchinchi preparat, avval “Avifavir” (“XimRar” va Rossiya Farmasevtika va ishlab chiqarish instituti) va “Promomed” kompaniyasining “Areplivir” preparatiga xulosa berilgandi.
Qo‘llash bo‘yicha ko‘rsatmalar
“Koronavir”dan faqat statsionar davolashda foydalanish mumkin. Homilador ayollarni davolashda dori vositasini qo‘llash taqiqlanadi, shuningdek, emizikli ayollarga, og‘ir buyrak xastaligi va buyrak yetishmovchiligi mavjud bemorlarni davolashda ham ushbu preparatdan foydalanib bo‘lmaydi. Preparatni 18 yoshdan kichiklarni davolashda ishlatish mumkin emas.
Dori vositasi favqulodda vaziyat kelib chiqishining oldini olish va uni bartaraf qilish sharoitida ro‘yxatdan o‘tkazilgan. Ko‘rsatma cheklangan miqdordagi klinik ma’lumotlar asosida tuzilgan va yangi axborotlar kelib tushganida yanada to‘ldiriladi.
“R-Farm” kompaniyasi Rossiya Farmasevtika va ishlab chiqarish instituti bilan hamkorlikda “Koronavir”dan tashqari infeksiyaga qarshi kurash uchun 4 milliarddan ko‘proq investitsiya mablag‘larini jalb etgan. Xususan, COVID-19 asoratlarini davolashga qaratilgan olokizumab preparati va kasallikka qarshi vaksina ishlab chiqiladi.
JSST tomonidan bildirilgan qiziqishAvval Jahon sog‘liqni saqlash tashkiloti “Aviafir” vositasi haqida ma’lumotlarni so‘ragan. Shuningdek, JSST Rossiyada ishlab chiqiladigan vaksina tayyor bo‘lishini kutmoqda.
Tashkilotning asosiy ilmiy xodimi Sumiya Svaminatan JSSTning maxsus dasturi asosida koronavirusga qarshi preparat va vaksinalar haqidagi ma’lumotlar almashinuvi amalga oshayotganini qayd etgan. Shuningdek, rossiyalik olimlar ham ushbu dastur doirasida o‘zaro hamkorlik qilishga rozi bo‘lishiga umid bog‘lagan.
Rossiya mazkur dastur ishtirokchisi emas. AQSh, Buyuk Britaniya, Xitoy va Fransiya davlatlari ham loyihada ishtirok etmayapti.
Izoh (0)