2020-yil boshidan buyon Toshkent shahriga jami 49 936 nafar fuqaro doimiy propiska qilingan bo‘lsa, shundan birgina may va iyun oylarida 39 626 nafar fuqaro doimiy ro‘yxatga kiritilgan. Bu haqda Ichki ishlar vazirligi xabar berdi.
Ma’lumotlarga ko‘ra, may va iyun oylarida 1-band bo‘yicha (qonun hujjatlariga muvofiq olingan uy-joyga ega bo‘lgan O‘zbekiston fuqarolari — xususiy mulk qilib olingan uy-joyga) 13 808 nafar, 2-band bo‘yicha (qarindoshlar — o‘zlarining to‘g‘ri shajara bo‘yicha birinchi va ikkinchi darajadagi qarindoshlarining doimiy yashash joyi bo‘yicha ro‘yxatga olingan uy-joy maydoniga yoki xususiy mulki bo‘lgan boshqa uy-joy maydoniga) esa 17 606 nafar fuqaro doimiy ro‘yxatdan o‘tkazilgan.
“Shuningdek, Toshkent shahri va Toshkent viloyatida 1-sentabrdan boshlab Qoraqalpog‘iston Respublikasi va boshqa viloyatlarda esa 2021-yilning 1-yanvaridan boshlab O‘zbekiston fuqarolarining doimiy yashash va vaqtincha yashab turgan joyi bo‘yicha ro‘yxatga olish bilan bog‘liq ishlar idoralararo hamkorlik orqali, Yagona darcha tamoyili asosida, Ichki ishlar vazirligining manzil avtomatlashtirilgan axborot tizimi orqali amalga oshiriladi”, — deyiladi xabarda.
Eslatib o‘tamiz, 2020-yil 21-aprelda Shavkat Mirziyoyev Toshkent shahri va viloyatiga doimiy propiska qilishni soddalashtirish haqidagi farmonni imzolagan. 29-aprelda esa Qonunchilik palatasi deputatlari propiska tizimini isloh qilish to‘g‘risidagi qonunni ma’qullagan, 12-may kuni senatorlar propiska tizimiga kiritiladigan o‘zgarishlarni ma’qullagan. Shavkat Mirziyoyev mazkur qonunni 13-may kuni imzoladi.
Izoh (0)