Superkarlar ishlab chiqarish bilan shug‘ullanuchi Lamborghini kompaniyasi Italiya avtozavodining ichida amalga oshiriladigan ishlar va Huracan Evo modelini yig‘ish jarayonlari tasvirlangan 48 daqiqali hujjatli film bilan bo‘lishdi.
Hujjatli filmda Santa-Agata-Bolonyezeda joylashgan Lamborghini’ning yagona avtozavodi ichi qanday ko‘rinishga ega ekanligi namoyish etilgan. 48 daqiqa davomida tomoshabin Huracan Evo’ni ishlab chiqarishning barcha bosqichlarini — modelni loyihalashdan tortib, tayyor superkar holiga kelguniga qadar bo‘lgan jarayonlarni tomosha qilishi mumkin.
Lamborghini kompaniyasi superkarlarning qo‘lda yig‘ilishi bilan mashhurlikka erishgan. Rolikdan ko‘rish mumkinki, brendning zavod tomonidan yaratilgan har bir avtomobili italiyalik muhandislarning qo‘lda yaratilgan haqiqiy ijodi hisoblanadi. Bundan tashqari, filmda ishlab chiqarish jarayonlari tarixiy kadrlar va poyga borasida muvaffaqiyatlar bilan boyitilgan.
Ma’lumot uchun, Lamborghini Huracan Evo modeliga 640 ot kuchi va 600 Nm aylanuvchi momentga ega 5,2 litrli V10 dvigateli o‘rnatilgan. Superkar agregati yetti pog‘onali “robot” uzatmalar qutisi yordamida boshqariladi. Model soatiga 100 kilometr tezlikka 2,9 soniyada erishadi, maksimal tezligi esa 325 km/soatga teng.
Avvalroq Volkswagen kompaniyasi e-Golf elektroxetchbekini buyurtma qilgan mijozlarga 215 yevro evaziga o‘z mashinasining yig‘ilishini tomosha qilish imkonini beradigan yangi xizmat turini yo‘lga qo‘ygan edi.