“Tottenhem” darvozaboni Ugo Lyoris “Everton”ga qarshi bahsning (1:0) tanaffus vaqtida jamoadoshi Son Hyon Min bilan yuz bergan kelishmovchilik haqida fikr bildirdi.
“Bu kiyinish xonasida hal bo‘ladigan ish. Uning tashqarisida esa xohlagan narsani gapirish mumkin.
Futbolchilar bir-birini hurmat qiladi. Son bilan o‘rtamizda sodir bo‘lgan voqea futbolning bir qismidir. Ba’zan shunday bo‘lib turadi, hech qanday muammo yo‘q.
O‘yin oxirida jamoaning bir ekanligimiz va g‘alaba qozonganimizdan mamnunligimizni ko‘rishingiz mumkin edi”, — deydi Lyoris.
Eslatib o‘tamiz, Son Hyon Min va Ugo Lyoris birinchi bo‘lim yakunlanib, jamoalar tanaffusga yo‘l olayotgan vaqtda o‘zaro tortishib qoldi. “Tottenhem” futbolchilari vaziyatga aralashib, ularni tinchlantirdi.
“Tottenhem” Premyer-Liga 33-turidan keyin 48 ochko bilan 8-o‘rinda bormoqda.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!