Ralf Rangnik “Milan”da qanday lavozimlarni egallashi ma’lum bo‘ldi

“Red Bull Zalsburg” bosh murabbiyi Ralf Rangnikning “Milan”ga qanday shartlar asosida kelishi ma’lum bo‘ldi.

Jurnalist Janluka di Marsioning xabariga ko‘ra, germaniyalik mutaxassis “Milan”da bir vaqtning o‘zida bosh murabbiy va texnik direktor lavozimini egallaydi. “Milan” bosh direktori Ivan Gazidis ushbu qarorni amaldagi texnik direktor Paolo Maldiniga ma’lum qilgan.

Ta’kidlanishicha, Maldini endilikda klub elchisi lavozimini egallashi mumkin. Uning klub bilan shartnomasi 2022-yilning yozigacha amal qiladi. Avvalroq Rangnik kelsa, Maldini jamoani tark etishi mumkinligi haqida xabarlar tarqalgandi. Boisi Maldini va  Rangikning transfer bozoridagi xohishlari bir-biriga mos bo‘lmasligi mumkin.

Ma’lumot uchun, Ralf Rangnik “Leypsig” va “Hoffenhaym”dagi faoliyati bilan yaxshi tanilgan. Paolo Maldini esa “Milan” afsonasi hisoblanadi. U 1985–2009-yillarda “rossoneri” safida to‘p surgan.