Agar kuzda o‘quv muassasalaridagi barcha mashg‘ulotlar masofaviy rejimga o‘tkaziladigan bo‘lsa, chet ellik talabalar AQShdan ketishi kerak, deya ma’lum qildi “Kommersant” mamlakat immigratsiya va bojxona nazorati xizmatiga tayanib.
Xuddi shu narsa yangi talabalar uchun ham amal qiladi. Agar o‘quv dasturlari kelgusi semestrda darslarni onlayn shaklda o‘tishni talab qilsa, mamlakatga keluvchi talabalarga viza berilmaydi.
Cheklovlar F-1 va M-1 vizalari bo‘lgan talabalarga tegishli hisoblanadi.
F-1 — bu universitet, kollej, maktab va boshqa ilmiy muassasalarda o‘qish uchun beriladigan viza. M-1 — akademik bo‘lmagan yoki kasbiy ta’lim dasturlari uchun beriladigan viza.
“Hozirda AQShda onlayn ta’lim olayotgan talabalar mamlakatdan chiqib ketishlari yoki boshqa choralarni ko‘rishlari kerak. Masalan, boshqa o‘quv yurtiga, kunduzgi o‘qish shakliga o‘tishlari kerak. Aks holda ular deportatsiya qilinishi mumkin”, — deyiladi xabarida.
Eslatib o‘tamiz, iyun oyida AQSh prezidenti Donald Tramp muhojirlarning bir qator viza turi bo‘yicha yuqori malakali ishchilarning mamlakatga kirishini vaqtincha cheklash to‘g‘risidagi hujjatni imzolagan edi. Ushbu harakat ishsiz amerikaliklar uchun ish joylarini tejashga qaratilgan.
Izoh (0)