Qashqadaryo viloyatining Dehqonobod tumanida 39 yoshli xotinini notanish erkakdan rashk qilgan er uni urib o‘ldirib qo‘ydi. Bu haqda Dehqonobod tuman IIB boshlig‘i G‘ayrat Haydarov hamda tuman hokimi o‘rinbosari Nodir Ismoilov ishtirokida bo‘lib o‘tgan qotillik jinoyati muhokamasida ma’lum qilingan.
Ta’kidlanishicha, voqea 2020-yilning 3-iyul kuni kechki payt sodir bo‘lgan.
Aniqlanishicha, marhum ayol R.N. 2020-yil 3-iyul kuni soat 18:00 da turmush o‘rtog‘i N.Sh. bilan o‘zaro tortishib qolgan. Turmush o‘rtog‘ining telefonda boshqa erkak bilan suhbatlashib turganini eshitgan N.Sh. xotiniga “Nima sababdan boshqa erkak kishi bilan telefon orqali gaplashyapsan?” deb janjal ko‘targan va turmush o‘rtog‘ini kaltaklagan. Kaltaklash oqibatida ayolining chap ko‘zi va orqa qismiga tan jarohati yetkazgan.
Eri tomonidan ayovsiz kaltaklangan R.N. o‘sha kuni og‘ir ahvolda tuman tibbiyot birlashmasining jonlantirish bo‘limiga olib kelingan. Ko‘rsatilgan tibbiy yordamga qaramay, u vafot etgan.
Marhumning jasadi sud tibbiy ekspertizadan o‘tkazilganda o‘lim bosh miya yopiq shikasti, bosh miya to‘qimalariga qon quyilishi, bosh miya yumshoq, qattiq pardalariga qon quyilishi, bosh miya lat yeyishi, tanasida ko‘plab qon talashlar, shilinmalar orqali yuzaga kelgani ma’lum bo‘lgan.
6-iyul, dushanba kuni tuman oila va mahallani qo‘llab-quvvatlash bo‘limida bo‘lib o‘tgan qotillik jinoyati muhokamasida so‘z olgan Dehqonobod tuman IIB boshlig‘i G‘ayrat Haydarov qotillik sodir etilishidan bir kun oldin ham er-xotin o‘rtasida mojaro kelib chiqqanini, ammo bundan MFY raisi va o‘rinbosari, hatto profilaktika inspektori ham bexabar qolganini tanqid qilgan.
“Bir kun oldin er-xotin janjal qilgan. Oilada o‘zaro kelishmovchilik bo‘lgan. Xo‘sh, nega o‘sha ayol mahalla raisining xotin-qizlar masalalari bo‘yicha o‘rinbosariga chiqib, voqeani aytmagan? Nega qo‘ni-qo‘shnilar bu haqda xabar bermagan? MFY raisi, uning o‘rinbosari va profiliktika inspektorining targ‘ibot tadbirlari shu darajada samarasizmi?”, — dedi G‘ayrat Haydarov.
G‘ayrat Haydarovning ma’lumot berishicha, mazkur voqea sabab MFY raisi, uning xotin-qizlar bo‘yicha o‘rinbosari va profiliktika inspektorining e’tiborsizligi o‘rganilmoqda.
“Profilaktika inspektorining e’tiborsizligi yuzasidan xizmat tekshiruvi boshlandi, tez orada aybdorlarga qilmishiga yarasha chora ko‘riladi”, — deydi Dehqonobod tuman IIB boshlig‘i.
Dehqonobod tuman mahalla va oilani qo‘llab-quvvatlash bo‘limi boshlig‘i Nodir Ismoilov esa bu mudhish hodisa tumandagi mavjud 46 ta MFY raisi va mas’ullariga saboq bo‘lishi lozimligini ta’kidladi.
Dehqonobod tuman IIB boshlig‘i o‘rinbosari Dilshod Mirzayevning qo‘shimcha qilishicha, mazkur holat yuzasidan tuman IIB huzuridagi Tergov bo‘limi tomonidan Jinoyat kodeksining 104-moddasi 3-qismi “d” bandi (Qasddan badanga og‘ir shikast yetkazish) bilan jinoyat ishi qo‘zg‘atilib, dastlabki tergov harakatlari olib borilmoqda. Marhumning turmush o‘rtog‘i Sh.N. esa shu kuni gumonlanuvchi tariqasida qamoqqa olingan.
Eslatib o‘tamiz, 2019-yil 10-oktabrdan 11-oktabrga o‘tar kechasi soat 01:30 da dehqonobodlik Q.F. ismli shaxs shar’iy nikohidagi ayoli M.A.ni avval bo‘g‘ib, so‘ngra g‘isht bo‘lagi bilan urib o‘ldirgani, so‘ngra jasadini kul uyumiga ko‘mgani haqida xabar berilgandi.
Mavzuga doir:
Izoh (0)