Buxoro viloyat DXX hamda viloyat bojxona boshqarmasi xodimlari tomonidan G‘ijduvon tumani “Sarmijon” YPX maskanida o‘tkazilgan tezkor tadbirda Toshkent shahridan jo‘natilgan 100 dona psixotrop dorilarning Buxorodagi xaridorlari qo‘lga olindi. Bu haqda “Daryo”ga Buxoro viloyati bojxona boshqarmasi axborot xizmati ma’lum qildi.
Huquq-tartibot idoralari tomonidan o‘tkazilgan tezkor tadbirda Toshkent—Buxoro yo‘nalishi bo‘yicha harakatlanib kelgan Epica to‘xtatilganda avtomobil yukxonasidan karton qutiga solingan to‘rt o‘ramda 25 qutidan jami 100 quti “Tropikamid” psixotrop dori vositalari borligi aniqlangan.
Ushbu avtotransport vositasi haydovchisi B.Sh. mazkur dori vositalari notanish shaxs tomonidan Toshkent shahridan pochta sifatida berib yuborilganini va ushbu pochtani Buxoro shahrida yashovchi Mehri ismli ayol qabul qilib olishini ma’lum qilgan.
Mazkur huquqbuzarlikni fosh etish hamda Mehri ismli shaxsni aniqlash maqsadida tezkor tadbir Buxoro shahrida joylashgan “Monika” savdo do‘koni yonida davom ettirilgan. Taksi haydovchisi B.Sh.dan karton qutida keltirilgan psixotrop dori vositalarini qabul qilib olgan fuqaro M.O. voqea joyida qo‘lga olingan.
Mazkur holat yuzasidan tegishli hujjatlar rasmiylashtirilgan. Ayni paytda surishtiruv ishlari olib borilmoqda.
Bundan avval O‘zbekiston hududidan tranzit orqali 238 ming dona psixotrop tabletkani olib o‘tishga urinish fosh qilingani, Farg‘onada psixotrop dorilarni 45 million so‘mga sotmoqchi bo‘lgan tibbiyot instituti talabalari qo‘lga olingani haqida xabar qilingan edi.
Izoh (0)