Tarixdagi eng ko‘p mablag‘ sarflangan 6 ta multfilm

“Shrek-2” — 150 million dollar

Qiziqarli va kulgili voqealar rivojidan tashkil topgan multfilmning ikkinchi qismida qahramonlarga yulduzlardan — Mayk Mayers, Eddi Myorfi va Kemeron Dias ovoz bergan. “Shrek-2” ekran yuzini ko‘rgan ilk dam olish kunlarining o‘zida 108 million dollar daromad keltirgan.

“Qahramonlar shahri” — 165 million dollar

Multfilmga sarflangan mablag‘ miqdori ko‘pchilikni hayratga solishi ajab emas. Lekin raqobatbardosh, tomoshabin e’tiborini jalb qilish uchun maksimal harakat qilinmaslikning iloji ham yo‘q. 2014-yilda taqdim qilingan multfilm, eng yaxshi to‘liq metrajli animatsion film nominatsiyasi bo‘yicha Oskar mukofotiga loyiq topilgan.

“Ralf” — 165 million dollar

Multfilm premyerasi 2012-yilda bo‘lib o‘tganiga qaramay, uning ustida 80-yillarda ish boshlangan. Ushbu fakt mazkur multfilmining Disney tarixidagi eng uzoq muddatda ishlab chiqarilganidan darak beradi. Ajratilgan budjetdagi mablag‘ning asosiy qismi texnika uchun sarflangan bo‘lib, aynan “Ralf”da ilk marta virtual kino olish tizimi sinovdan o‘tkazilgan.

“Tepaga ” — 175 million dollar

Multfilm qahramonining uyi bilan birga Janubiy Amerikaga uchishini tasvirlash uchun, rejissor Piter Dokter, Pixar’ning 11 nafar rassomi bilan birgalikda Venesuelaga jo‘nagan. Ishonarli chiqishi va chizmalar aniq bo‘lishi uchun jamoa ancha ter to‘kishiga to‘g‘ri kelgan. Voqealar rivoji mukammal bo‘lishi uchun fizik qonuniyatlar inobatga olinib, RenderMan dasturidan foydalangan holda o‘ziga xos multfilm yaratilgan.

“Jumboq” — 175 million dollar

Ushbu multfilm, bir vaqtlar Stiv Jobs tomonidan asos solingan Pixar kompaniyasining ijod mahsuli hisoblanadi. Sujetga ko‘ra, qizaloq ongidagi hissiyotlar odamlar ko‘rinishida bo‘ladi. Ularning emotsiyalari, ranglar va harakatlarini mukammal ifodalash kompaniyaga 175 million dollarga tushgan.

“Koko siri” — 175 million dollar

Mazkur multfilm ham Pixar’ga tegishli. Kompaniya kompyuter animatsiya rivojiga kinosanoatdagi boshqa kompaniya yoki studiyadan ko‘proq hissa qo‘shgan hisoblanadi. Kompaniya arsenaliga mansub, eng muvaffaqiyatli ijod mahsulidan biri “Koko siri” multfilmi hisoblanadi. Multfilmda animatsiyada tasvirlash murakkab bo‘lgan ikki vazifa — skelet va voqealar rivoji aks etadigan tun qismini aniq va tiniq qilib aks ettirish uddasidan chiqilgan.