Samarqand viloyatida 27-iyun kuni ikki boshli chaqaloq dunyoga kelganligi haqida xabar berilgan, viloyat bolalar ko‘p tarmoqli tibbiyot markazi mutaxassislari reanimatsiya bo‘limida kuzatuv ostida bo‘lgan chaqaloqning ahvoli yomon emasligini bildirgandi. “Sevimli” telekanalining “Zamon” informatsion dasturida esa chaqaloqlardan uning oilasi voz kechgani ma’lum qilingandi.
Viloyat sog‘liqni saqlash boshqarmasi boshlig‘ining onalik va bolalik bo‘yicha o‘rinbosari Sayfiddin Mo‘minov chaqaloqni olish yoki olmaslikni avvalambor ota-onasi hal qilishi, chaqaloqlarning onasi esa ayni paytda jiddiy jarrohlik operatsiyasini boshidan o‘tkazgani tufayli davolanishda bo‘lgani uchun farzandidan voz kechishi haqidagi gaplar asossiz ekanligini bildirdi. Bu haqda Zarnews xabar bermoqda.
“Egizaklarning onasi ayni paytda jiddiy jarrohlik operatsiyasini boshidan o‘tkazgani tufayli davolanishda. Shuning uchun hozircha uning farzandidan voz kechishi haqidagi gaplar asossiz. Chaqaloqni olish yoki olmaslikni avvalambor ota-onasi hal qiladi. Ayni paytda muhimi egizaklarning salomatligini nazorat qilish, ularni davolashdan iborat. Ularni davolash uchun viloyat bolalar ko‘p tarmoqli tibbiyot markazining intensiv terapiya bo‘limi shifokorlari barcha sa’y-harakatlarni amalga oshirmoqda.
Sog‘liqni saqlash vazirligidan ham tegishli ko‘rsatmalar berilmoqda. Shifokorlar siam egizaklarini davolashda yetarli tajribaga ega. Garchi bu chaqaloqlar boshqacha ko‘rinishda bo‘lsa-da, ammo ulardagi xastaliklar oddiy tug‘ilgan chaqaloqlarniki singaridir”, — deydi viloyat sog‘liqni saqlash boshqarmasi boshlig‘ining onalik va bolalik bo‘yicha o‘rinbosari Sayfiddin Mo‘minov.
Ta’kidlanishicha, ona farzandi patologiya bilan tug‘ilishi haqida ogohlantirilgan. Ammo uning xohishiga ko‘ra, homila to‘xtatilmagan. Tegishli qoidalarga ko‘ra, onadan beruxsat uning homilasini to‘xtatishga shifokorlarning haqi yo‘q.
“Hozirda egizak qizaloqlar sun’iy nafas oldirish apparatida bo‘lib, ahvoli juda og‘ir. Ikkita yurakda ham jiddiy, murakkab nuqsonlar mavjud. Chaqaloqlarning ichki organlari bir boshdan to‘liq tibbiy tekshiruvdan o‘tkazilmoqda. Ayni paytda ularning oshqozoni ham ikkitaligi ma’lum bo‘ldi. Egizaklarning salomatligi bo‘yicha to‘liq va aniq ma’lumotlarni aytish uchun qo‘shimcha ko‘plab tibbiy tekshiruvlar o‘tkazilishi kerak. Afsuski, siam egizaklarining ahvoli og‘ir bo‘lib, apparatda bo‘lgani uchun bu tekshiruvlarning barchasini amalga oshirish imkoniyatimiz yo‘q. Diagnostika uchun esa zamonaviy apparatlarimiz bor”, — deydi viloyat bolalar ko‘p tarmoqli tibbiyot markazi bosh vrachi o‘rinbosari Dilshod Rahmonov.
Uning aytishicha, bunday holda tug‘ilgan chaqaloqlar Samarqandda hozircha birinchi, deb aytish mumkin. Respublikadagi mutaxassislar bilan o‘rganish natijalariga ko‘ra, O‘zbekistonda oldin ham bitta shunday holat kuzatilgan. “Chaqaloqlarga biror-bir jarrohlik amaliyoti ular to‘liq o‘rganib chiqilgach, keyin amalga oshiriladi. Ayni paytdagi birinchi vazifamiz ularning hayotini saqlab qolishdan iborat”, — deydi Dilshod Rahmonov.
Izoh (0)