“Yuksalish” umummilliy harakati O‘zbekiston hukumati va parlamentining rahbar xodimlari qaysi oliy ta’lim muassalarida tahsil olgani haqida ma’lumot berdi.
O‘zbekiston parlamenti rahbariyati tarkibida Senat raisi Tanzila Norboyeva va Qonunchilik palatasi spikeri Nurdinjon Ismoilov, shuningdek, Senat raisining birinchi o‘rinbosari Sodiq Safoyev hamda Qonunchilik palatasi spikerining birinchi o‘rinbosari Akmal Saidov o‘z vaqtida O‘zbekiston Milliy universitetini tamomlagan. Shuningdek, Sodiq Safoyev AQShning Garvard universitetida ham ta’lim olgan.
Senat raisi o‘rinbosari Musa Yerniyozov Toshkent irrigatsiya va qishloq xo‘jaligini mexanizatsiyalash muhandislari institutini tugatgan. Senat rasining yana bir o‘rinbosari Zayniddin Nizomxo‘jayev Toshkent tibbiyot akademiyasida o‘qigan.
Oliy Majlisning Qonunchilik palatasi spikerining 5 nafar o‘rinbosaridan 3 nafari Toshkent davlat texnika universiteti bitiruvchilari hisoblanadi. Ular — Narimon Umarov, Ulug‘bek Inoyatov, Boriy Alixonov. Shu bilan birga, Ulug‘bek Inoyatov Toshkent moliya institutida ham ta’lim olgan.
Qonunchilik palatasi spikerining o‘rinbosari Alisher Qodirov Toshkent moliya instituti va Turkiyaning Egey universitetida oliy ta’lim olgan.
Quyi palata rahbarining yana bir o‘rinbosari Akmal Hayitov Samarqand iqtisodiyot va servis instituti bitiruvchisi hisoblanadi.
Ma’lum qilinishicha, bosh vazirning 5 nafar o‘rinbosaridan 4 nafari Toshkent davlat iqtisodiyot universitetini bitirgan. Ular — bosh vazir o‘rinbosari — iqtisodiy taraqqiyot va kambag‘allikni qisqartirish vaziri Jamshid Qo‘chqorov, bosh vazir o‘rinbosari — investitsiyalar va tashqi savdo vaziri Sardor Umurzoqov, bosh vazir o‘rinbosari — turizmni rivojlantirish davlat qo‘mitasi raisi Aziz Abduhakimov hamda bosh vazirning ijtimoiy rivojlanish masalalari bo‘yicha o‘rinbosari Behzod Musayev.
Shu bilan birga, ularning 3 nafari xorijiy OTMlarda ta’lim olgan. Jumladan, Jamshid Qo‘chqorov AQShning Kolorado shtati iqtisodiyot institutini, Sardor Umurzoqov Buyuk Britaniyaning Reding universitetini, Aziz Abduhakimov Yaponiyaning Xitotsubasi universitetini tamomlagan.
Bosh vazirning birinchi o‘rinbosari Ochilboy Ramatov Toshkent temir yo‘l muhandislari institutini tamomlagan. Bosh vazirning qishloq xo‘jaligi masalalari bo‘yicha o‘rinbosari O‘ktam Barnoyev Toshkent irrigatsiya va qishloq xo‘jaligini mexanizatsiyalash muhandislari institutini tugatgan. Bosh vazirning axborot texnologiyalarini rivojlantirish masalalari bo‘yicha maslahatchisi Olimjon Umarov Mirzo Ulug‘bek nomidagi O‘zbekiston Milliy universiteti va Janubiy Koreyaning Songyungvan universitetida o‘qigan.
O‘zbekistonning 8 nafar vaziri — Ibrohim Abdurahmonov, Ruslanbek Davletov, Timur Ishmetov, Jamshid Qo‘chqorov, Alisher Sultonov, Sardor Umurzoqov, Jamshid Xo‘jayev va Sherzod Shermatov xorijiy oliy ta’lim muassasalari diplomlariga ega. 10 nafar vazir 2 tadan oliy ta’lim muassasasini tamomlagan, moliya vaziri Timur Ishmetov esa 3 ta — Toshkent davlat yuridik universiteti, Toshkent moliya instituti va Buyuk Britaniyaning Birmingem universitetida ta’lim olgan.
Izoh (0)