Amerika maxsus xizmatlari “Tolibon” jangarilari va rossiyalik harbiy razvedkachilar o‘rtasida giyohvand moddalar oldi-sotdisi bilan shug‘ullanuvchi Rahmatullo Aziziy ismli shaxs vositachi bo‘lgan deb hisoblamoqda. Bu haqda The New York Times gazetasi o‘z manbalariga tayanib, ma’lum qildi.
Ma’lumotlarga ko‘ra, Aziziy Afg‘onistondagi amerikalik va xalqaro koalitsiya harbiylarining o‘ldirilgani uchun mukofot pullarini “Tolibon” a’zolariga topshirgan.
NYT’ning yozishicha, maxsus xizmatlar Aziziyning iziga tushgan va uning qarindoshlarini bir qismini qo‘lga olgan bo‘lsa-da, gumonlanuvchining o‘zi Rossiyaga qochib ketgan.
Shuningdek, nashrning ta’kidlashicha, Aziziy bilan Rossiyaning 29155-sonli harbiy razvedka bo‘linmasi vakili aloqada bo‘lgan.
Avvalroq The New York Times va Washington Post gazetalari Rossiya harbiy razvedkasi bo‘linmasi “Tolibon” harakatiga bog‘liq jangarilarga Afg‘onistondagi xalqaro koalitsiya harbiylarini o‘ldirganlik uchun maxfiy ravishda mukofot taklif qilgani to‘g‘risida yozgandi. “Tolibon” harakati esa Rossiya buyurtmasiga ko‘ra, amerikalik harbiylarni o‘ldirgani to‘g‘risidagi maqolaga raddiya berib, o‘zlari biror-bir razvedka organi yoki xorij davlatining foydasiga bog‘lanmaganini bildirgan.
O‘z navbatida AQShdagi Rossiya elchixonasi asossiz va anonim ayblov sabab Vashington va Londondagi rossiyalik diplomatlar to‘g‘ridan to‘g‘ri tahdidlarga uchray boshlaganini ma’lum qilgan.
Keyinroq AQSh Rossiya razvedkasi amerikalik harbiylarni o‘ldirgani uchun “Tolibon”ga pul o‘tkazgani to‘g‘risidagi ma’lumotlarni qo‘lga kiritgani ma’lum bo‘lgandi.
Izoh (0)