Koronavirusdan vafot etgan qashqadaryolik 27-bemor davolangan bo‘limda faoliyat yurituvchi hamshira tumandoshlari taqdiridan xavotirga tushayotganini ma’lum qildi. Bu haqda “Daryo” muxbiri bilan suhbatlashgan hamshiraning aytishicha, bemor davolangan bo‘lim shifokor va hamshiralarining ayrimlari TTB qoshidagi Markaziy poliklinikada ajratilgan ikkita xonada bugungi kunda aholiga tibbiy xizmat ko‘rsatmoqda.
“Koronavirusdan vafot etgan bemor davolangan bo‘limda ishlaganlarning 50 dan ortig‘i va 100 nafarga yaqini bo‘limda karantinga olindi. Qolganlar esa uy sharoitida o‘zini yakkalash tartibiga o‘tdik. Ammo hamma uy karantiniga o‘tdi deb bo‘lmaydi. Biz bilan 29-iyun kuni o‘sha bo‘limda ishlagan shifokor va hamshiralarning ayrimlari bugungi kunda Markaziy poliklinikada aholiga tibbiy xizmat ko‘rsatishda davom etmoqda”, — deydi shaxsini ochiqlasa, bosim o‘tkazilishidan qo‘rqqan hamshira.
G‘uzorlik hamshiraning aytishicha, bemor vafot etgan kun — 29-iyunda shoshilinch tez tibbiy yordam bo‘limida ishda bo‘lgan, bemorni davolagan shifokor va hamshiralar bilan muloqotga kirishgan Oktabr Nurxonov, hamshiralar Lobar Jumayeva hamda Dilfuza Qurbonova tuman tibbiyot birlashmasida shoshilinch tez tibbiy yordam bemorlari uchun tashkil etilgan xonada aholiga xizmat ko‘rsatishda davom etmoqda.
“Yuqorida tilga olingan tibbiyot xodimlari kasallikni yuqtirgan degan fikrdan yiroqman. Ammo ular ham biz kabi bemorni davolagan shifokor va hamshiralar bilan muloqotda bo‘lgan. Yuqtirib olgan bo‘lish ehtimoli yo‘q emas, albatta. Shuni bila turib, tumandoshlarimiz hayotini xavf ostiga qo‘yishlari shartmi? Rahbarlar nega bunga jim qaramoqda. Tumanda boshqa mutaxassis yo‘qmi yoki?”, — deydi suhbatdosh hamshira.
“Daryo” muxbiri bilan suhbatlashgan hamshiraning ma’lumot berishicha, shoshilinch tez tibbiy yordam bo‘limi joylashgan binoda bolalar bo‘limi, terapiya, rejali jarrohlik, jonlantirish va qabul bo‘limlari ham joylashgan.
“Tumanimizda tibbiyot xodimlari yetarli darajada. Shunday ekan, xalq sog‘lig‘ini xavf ostiga qo‘ymay, o‘sha kuni bu bo‘limda bo‘lmagan tibbiyot xodimlarini ishga jalb qilishsa bo‘ladi-ku. Men tibbiyot xodimi sifatida o‘sha shifokorlarga ko‘rinmaslikni maslahat berishim mumkindir, ammo hech narsadan xabari bo‘lmay shifokor ko‘rigiga boradigan odamlar qancha-qanchani tashkil etadi. Bu odamlar taqdiri bilan o‘ynashishdan boshqa narsa emas”, — deydi hamshira.
Suhbatdosh hamshiraning fikricha, bu kabi e’tiborsizlikka tuman hokimi va tuman tibbiyot birlashmasining bosh shifokori aybdor.
“Hokim qayerga qarayapti, tuman tibbiyot birlashmasi bosh shifokori Akrom Berdiyev-chi?”, — deydi tibbiyot xodimi.
Eslatib o‘tamiz, avvalroq G‘uzor tuman tibbiyot birlashmasida ishlovchi tibbiyot xodimi videomurojaat bilan chiqdi.
“28-iyun kuni Eskibog‘dan Hazratqul Sobirov ismli koronavirusga chalingan bemorni olib kelishdi. Tez yordam haydovchilari isitmasi baland bemorni nega yuqumli kasalliklar shifoxonasiga emas, aynan bizning bo‘limga olib kelishganiga hayronmiz. Shundan so‘ng bemor vafot etdi. Vafot etgandan so‘ng ham uning murdasini hech kim bo‘limdan olib chiqmadi. Kechasi soat ikkilarda biz o‘zimiz marhumni yaqinlariga jo‘natdik. Hamma tibbiyot xodimlari, hattoki ma’muriyat o‘zini olib qochdi. Murda 15 soat shifoxonaning ichida turdi. Hamshiralar bilan bir amallab o‘zimiz bemorni olib chiqdik”, — deydi videomurojaat qilgan tibbiyot xodimi.
Videomurojaatda aytilishicha, marhumning turmush o‘rtog‘ining ham ahvoli og‘irlashgani bois, Qarshi shahriga olib ketilgan. Akasi esa tumanda davolanmoqda.
Videomurojaat muallifi, shuningdek, karantinga olingan bo‘lim dezinfeksiya qilinmayotganini, antiseptik vositalar va oziq-ovqat yetishmasligini, bir martalik tibbiyot kiyimlari almashtirilmayotganidan shikoyat qiladi.
Murojaatchi, shuningdek, virus o‘chog‘ida ishlayotgani uchun to‘lanishi lozim bo‘lgan mablag‘ haqida ham so‘z yuritadi. Mazkur videomurojaatga Sog‘liqni saqlash vazirligi hozircha munosabat bildirmadi.
Izoh (0)