Uzbekistan Airways kompaniyasi 2020-yil 1-iyuldan aviachiptalar va xizmatlar uchun to‘langan summalar qaytarilishining yangi qoidalarini joriy qildi. Bu haqda kompaniya tomonidan xabar berildi.

Foto: “Daryo”

Ma’lum qilinishicha, yo‘lovchilar tomonidan aviachiptalar va qo‘shimcha xizmatlar uchun 2020-yil 31-dekabrgacha to‘langan summani qaytarishni ta’minlash uchun 2020-yil 1-iyuldan depozit vaucherlarni rasmiylashtirish amalga oshiriladi.

Depozit vaucherini rasmiylashtirishda qaytarilishi lozim bo‘lgan chipta narxi summasiga aviachiptani xarid qilgan joy bo‘yicha shu summaning 5 foizga teng bonus qo‘shib beriladi.

Kompaniya tomonidan qayd etilishicha, depozit vaucherlari ularni rasmiylashtirish sanasidan boshlab bir yil davomida yo‘lovchilar tomonidan Uzbekistan Airways’ning reyslaridagi har qanday boshqa tashuv to‘lovlari yoki qo‘shimcha xizmatlar to‘lovlari uchun foydalanilishi mumkin.

Vaucherni rasmiylashtirish sanasidan bir yil o‘tishi bilan depozitning foydalanilmagan summasi yo‘lovchiga to‘lov shaklida qaytariladi.

Ta‘kidlanishicha, depozit vaucherlarini qo‘llash Prezident raisligida Vazirlar Mahkamasining karantin davrida transport tizimi barqarorligini ta’minlash masalalari bo‘yicha 2020-yil 25-maydagi yig‘ilishi qarori asosida kiritilmoqda.