O‘zbekistonda koronavirusga chalinganlar soni 8500 nafardan oshdi

O‘zbekistonda 2020-yil 30-iyun soat 23:30 holatiga ko‘ra, koronavirus infeksiyasi qayd etilganlar soni 87 kishiga ko‘payib, 8503 nafarni tashkil etmoqda. Bu haqda Sog‘liqni saqlash vazirligi xabar berdi.

Yangi kasallanganlarning

• 74 nafari karantin markazidagi fuqarolar (barchasi xorijdan kelgan) orasida;
• 18 nafari Toshkent viloyatida (shundan 13 nafari koronavirusga chalinganlar bilan muloqotda bo‘lib, karantinga olingan fuqarolar orasida, 5 nafari aholi orasida);
• 17 nafari Samarqand viloyatida (shundan 14 nafari koronavirusga chalinganlar bilan muloqotda bo‘lib, karantinga olingan fuqarolar orasida, 3 nafari aholi orasida);
• qolgan 9 nafari Toshkent shahrida (shundan 5 nafari koronavirusga chalinganlar bilan muloqotda bo‘lib, karantinga olingan fuqarolar orasida, 4 nafari aholi orasida) aniqlangan.

Shu paytga qadar mamlakatda koronavirus infeksiyasiga chalingan 5682 nafar fuqaro tuzalib, sog‘ayish ko‘rsatkichi 66 foizni tashkil etmoqda. Hozirda mamlakatda 2795 nafar bemorga shifokorlar tomonidan belgilangan standartlar bo‘yicha davo choralari ko‘rilmoqda.

Avval O‘zbekistonda 30-iyun soat 10:00 holatiga ko‘ra, koronavirus infeksiyasi qayd etilganlar soni 23 kishiga ko‘paygani, soat 17:00 holatiga ko‘ra esa yana 87 kishida koronavirus aniqlanib kasallanganlarning umumiy soni 8385 nafarga yetgani haqida xabarlar berilgan.

Hozirga qadar mamlakatda 26 kishi COVID-19 qurboniga aylangan.

Eslatib o‘tamiz, O‘zbekistonda koronavirus bilan bog‘liq vaziyat tobora jiddiylashayotganini hisobga olib, Respublika maxsus komissiyasining qarori bilan 2020-yil 1-iyuldan boshlab, qator karantin cheklovlari kuchaytiriladi. O‘zbekistondagi barcha buyum bozorlari haftaning har shanba va yakshanba kunlari yopiladi. “Qizil” va “sariq” hududlarda soat 23:00 dan keyin ko‘chada yurish taqiqlandi. “Sariq” hududlarida soat 22:00 dan keyin maxsus ruxsatnomasiz yurgan avtomobillarga qarshi nazorat kuchaytiriladi.