Toshkent shahar Chilonzor tumani hokimligi bo‘lim boshlig‘i tadbirkorga yerga egalik huquqini rasmiylashtirib berish uchun 50 ming dollar pora olayotganida ushlandi. Bu haqda “Gazeta.uz” o‘zining huquq-tartibot idoralaridagi manbasiga tayanib, xabar berdi.
Ma’lumotlarga ko‘ra, davlat xizmatchisi tadbirkorga 1,4 millon AQSh dollari evaziga 1 gektar yerga egalik huquqini rasmiylashtirib berishni va’da qilgan.
Hokimlik vakili Davlat xavfsizlik xizmati xodimlari tomonidan 25-iyun kuni o‘tkazilgan tezkor tadbir davomida ushlangan.
Qo‘lga olingan shaxsga nisbatan Jinoyat kodeksining 210-moddasi (“Pora olish”) bo‘yicha jinoyat ishi qo‘zg‘atilgan.
Avvalroq Toshkent viloyatida 60 ming dollarga yer sotmoqchi bo‘lgan tuman hokimi o‘rinbosari qo‘lga olingani to‘g‘risida xabar berilgandi.