“Mingta kambag‘al oilani ‘temir daftar’dan o‘chirtirmoqchimiz”. Namanganlik uch aka-uka tadbirkor rejalari haqida

Avval xabar berganimizdek, 26-iyun kuni O‘zbekiston Prezidenti Shavkat Mirziyoyev Namangan viloyatiga tashrif buyurdi. Davlat rahbari safar chog‘ida Chortoq tumanidagi adir-dashtliklarda barpo etilayotgan issiqxonalar majmuasi bilan tanishdi.

Umumiy qiymati 13 milliard so‘m bo‘lgan loyihani Golden Nuts Namangan agrotomorqa xizmati MChJ amalga oshirmoqda. Jarayonlarni Namangandan turib yoritayotgan “Daryo” muxbiri MChJ rahbari Ahadxon Egamberdiyev bilan intervyu uyushtirdi.

YTTdan oilaviy biznes sari“Biz oilaviy tadbirkormiz. Akam Akmalxon, ukam Kamolxon ham ishbilarmon. Bilasiz, Namangan viloyatida kastyum-shim tikish azaldan urfga kirgan. Dastlabki faoliyatimiz mobaynida biz ham yakka tartibdagi tadbirkor sifatida tikuvchilik qilib, ro‘zg‘or tebratganmiz. 2015-yili uch aka-uka birlashib, Namangan tumanida “Asadbek g‘isht sanoati” MChJni tashkil etdik. Katta loyihaga qo‘l urganimiz bois avvaliga biroz cho‘chiganimiz rost. Lekin o‘zimizga nisbatan ishonch va tajriba sabab astoydil ishlashga yeng shimardik.

MChJ faoliyati g‘isht ishlab chiqarish va uni sotishdan boshlandi. Keyin 4 gektar maydonga issiqxona qurdik. 2018-yili meva-sabzavotlarni qayta ishlash sexini ishga tushirdik. Shu tariqa faoliyatimiz kengayib bordi. Hozirda oilaviy jamiyatimizda sun’iy gullar va yumshoq o‘yinchoqlar ham ishlab chiqariladi. Shuningdek, 100 gektar yerga g‘alla va paxta ham ekamiz. Jami 400 nafar ishchisiga ega “Asadbek g‘isht sanoati”dan 2019-yili 2 milliard so‘m daromad topdik”.

Qayta ishlangan mahsulotlar jahon bozoriga chiqmoqda“Yuqorida aytib o‘tganimdek, ikki yildan beri meva-sabzavotlarni konservalash va eksport qilish bilan ham shug‘ullanamiz. Qulupnay, gilos, o‘rik, olma, xurmo, pomidor, bodiring kabi yigirmaga yaqin tabiat ne’matlaridan sharbat, murabbo, tuzlamalar tayyorlaymiz. Bugungi kunda qayta ishlangan 45 xil mahsulotimiz Rossiya, Qozog‘iston, Qirg‘iziston va mahalliy bozordagi hamkorlarimizga yetkazib berilmoqda. O‘tgan yili 1 million dollarlik eksport qilgan bo‘lsak, bu yil ushbu ko‘rsatkichni 5 million dollarga yetkazishni rejalashtirganmiz.

Mahsulotlarimizga talab ortgani sari qayta ishlash uchun yetarli meva-sabzavotlar topa olmayapmiz. 2019-yili ham biroz qiynaldik. Mazkur muammoni viloyat hokimiga aytib, yer ajratib berishlarini so‘radik. Bizga mana shu loyihani taklif etishdi. Uch aka-uka bajonidil qabul qildik va ikkinchi oilaviy MChJ — Golden Nuts Namangan agrotomorqa xizmatini tuzdik”.

“Bitta issiqxona 13 million so‘mga bitadi”“Yangi loyihamiz Chortoq tumanidagi baland adir-dashtliklarda ko‘p yillar davomida foydalanilmagan maydonda amalga oshirilmoqda. Suv, elektr energiyasi va yo‘l muammosi viloyat hokimining ko‘magi bilan hal etildi. Hozir 2 ta quduqdan suv chiqadi, kelgusida yana 18 ta quduq qazish kutilmoqda, 7 kilometr yo‘lga esa asfalt yotqizildi.

36 gektar yerda barpo etilayotgan har biri 2 sotixli 1000 ta issiqxona hududdagi kambag‘al oilalar uchun mo‘ljallangan. Ayni paytda 800 ta issiqxona qurilib, o‘z egalariga topshirildi. Qolgan 200 tasi iyul oyi oxirida foydalanishga beriladi.

Bitta issiqxona 13 million so‘mga tayyor bo‘lmoqda. Bandlikka ko‘maklashish jamg‘armasi 6,7 million so‘m subsidiya mablag‘lari ajratyapti. Qolgan 6,3 million so‘mni esa tijorat banklari 3 yilga imtiyozli kredit sifatida ajratmoqda. Bu esa oilalar uchun juda katta imkoniyat. Umumiy qiymati 13 milliard so‘m bo‘lgan loyihaga Bandlikka ko‘maklashish jamg‘armasi hisobidan 6,7 milliard so‘m subsidiya mablag‘lari va tijorat banklarining 6,3 milliard so‘mlik imtiyozli krediti yo‘naltirilmoqda”.

“Kambag‘al oilalarga hamisha maslakdoshmiz”“Loyihamiz orqali ‘Bir mahalla — bir mahsulot’ tamoyili asosida bir joyda eksportbop sifatli mahsulot yetishtiriladi, kambag‘al oilalar doimiy daromad manbalariga ega bo‘ladi va ularning bandligi ta’minlanadi.

O‘z issiqxonasiga ega bo‘lgan 1000 ta oilaga yaqindan ko‘maklashamiz. Ularga mahsulotni yetishtirishda ko‘chat, suv, mineral o‘g‘itlarni yetkazib beramiz. Hosil tayyor bo‘lgach, bozor narxida yana o‘zimiz sotib olamiz va qayta ishlab, xorijga eksport qilamiz.

2 sotixli issiqxonada uch marta hosil yetishtirish imkoniyati mavjud. Bitta issiqxonada 700 tup pomidor ko‘chati ekilgan. Har bir tup ko‘chatdan o‘rtacha 4-5 kilogrammdan mahsulot olish mumkin. Bitta oila yiliga o‘rtacha 40 million so‘m sof foyda topadi. Bu, albatta, har bir oila va uning a’zolari xatti-harakatiga bog‘liq. Biz ham kambag‘allikka qarshi kurashishni maqsad qilganmiz. ‘Temir daftar’ga tushgan 1000 ta kambag‘al oila hayotini farovon bo‘lishiga hissa qo‘shsak, ko‘zlagan maqsadimizdan biriga erishgan bo‘lamiz”.

Mirolim Isajonov suhbatlashdi