O‘zbekistonda 25-iyun kuni 276 kishida koronavirus aniqlandi, 192 kishi kasallikdan sog‘aydi. Ikkala holat ham mutlaq rekord

O‘zbekistonda 24-iyun soat 23:30 dan 25-iyun soat 23:30 ga qadar koronavirus yuqtirib olish bilan bog‘liq 276 ta holat qayd etildi. Bu yangi rekord. Ketma-ket ikkinchi kun kasallar bo‘yicha rekord yangilanmoqda. 24-iyun kuni 239 kishida kasallik aniqlangandi. Yangi qayd etilgan holatlardan so‘ng O‘zbekistonda koronavirusga chalinganlar soni 7177 nafarga yetdi.

Iyun oyida bir kunda kasallanganlar soni 6 marta 200 nafardan oshgan bo‘lib, ularning teng yarmi so‘nggi uch kunlikda qayd etildi — 23-iyunda 201 kishi, 24-iyunda 239 kishi, 25-iyunda 276 kishi.

Yangi kasallanish holatlari

Yangi kasallanganlarning

• 243 nafari karantin muassasalarida;
• 24 nafari aholi orasida (Toshkent shahrida — 17 nafar, Toshkent viloyatida — 4 nafar, Jizzax viloyati — 2 nafar, Andijon viloyatida — 1 nafar);
• 9 nafari esa xalqaro yuk tashuvchi avtomashina haydovchilari orasida (ularning barchasi Toshkent viloyatida) aniqlangan.

Kun davomida 6 ta hududda yangi kasallanganlar qayd etildi. Ushbu hududlarning 4 tasida aholi orasida koronavirus aniqlandi.

Kunning e’tiborga molik jihatlaridan biri Jizzax viloyatiga koronavirus qaytdi. 27-aprel kuni viloyatdagi oxirgi bemorlar shifoxonalardan sog‘ayib chiqqan va viloyat koronavirusdan xoli hududga aylangandi. Ikki oyga yaqin vaqt davomida Jizzaxda bironta ham kasallik holati qayd etilmagandi. 25-iyun kuni esa aholi orasida 2 kishida koronavirus aniqlandi. Iyun oyi davomida Qashqadaryo, Xorazm va Surxondaryo viloyatlari ham koronavirusdan xoli hudud maqomini yo‘qotgandi.

Toshkent shahrida ketma-ket ikkinchi kun kasallikka chalinganlar soni 69 kishini tashkil etmoqda. 25-iyun kuni koronavirus aniqlanganlardan 52 nafari koronavirusga chalinganlar bilan muloqotda bo‘lib, karantinga olinganlar orasida, 17 nafari aholi orasida aniqlangan. Toshkent kun davomida aholi orasida eng ko‘p koronavirusga chalinganlar aniqlanishi bo‘yicha oxirgi 10 kunda 8 marta yetakchi bo‘ldi. Iyun oyida poytaxtda faqat 3-iyun kuni aholi orasida kasallik aniqlanmagan.

Toshkent viloyatida qayd etilgan holatlarning 10 tasi koronavirusga chalinganlar bilan muloqotda bo‘lib, karantinga olinganlar orasida, 9 tasi xalqaro yuk tashuvchi mashina haydovchilari orasida va 4 tasi aholi orasida aniqlandi. Viloyatda 9 kundan beri aholi orasida, 12 kundan beri xalqaro yuk tashuvchi mashinalar haydovchilari orasida uzluksiz ravishda kasallik aniqlanmoqda.

Andijon viloyatida aniqlangan yagona holat aholi orasida qayd etildi. 20-iyun holatiga ko‘ra, “yashil” hudud deb belgilangan Andijon viloyatida 21-iyun va 23-iyun kuni ham aholi orasida kasallik aniqlangandi.

 Namangan viloyatida aniqlangan birgina holat koronavirusga chalinganlar bilan muloqotda bo‘lib, karantinga olingan fuqarolar orasida qayd etilgan.

Surxondaryo viloyatida ham karantindagilar orasida bitta holat qayd etildi. 14-iyunda viloyatga koronavirus qaytgandi. Shundan buyon yangi kasallanganlar aniqlangan kunlarda aholi orasida ham kasallanish holatlari qayd etilayotgandi. 14-iyun kuni 9 ta holatning bari, 17-iyun kuni 6 ta holatdan 2 tasi va 20-iyun kuni 4 tadan 1 tasi, 23-iyun kuni 11 tadan 2 tasi aholi orasida aniqlangandi.

Kasallikdan davolanish

25-iyun davomida 192 nafar fuqaro sog‘aydi. Ulardan 170 nafari Toshkent shahri, 17 nafari Qashqadaryo va 5 nafari Namangan viloyatlaridagi tibbiyot muassasalarida shifo topdi. Bir kun ichida bemorlar sog‘ayishi bo‘yicha bu mutlaq rekord hisoblanadi. Bungacha 5-iyun kuni 160 kishining sog‘ayishi rekord edi.

5-iyunda koronavirus qaytgan Qashqadaryo viloyatida oxirgi marta koronavirusga chalingan bemor 1-mayda sog‘ayib chiqqandi. 25-iyun kuni COVID-19’dan tuzalganlarning 6 nafari ushbu hududdan bo‘lsa, 10 nafari Qozog‘iston, 1 nafari Turkiya fuqarosidir (11-iyun kuni viloyatda 27 nafar qozog‘istonlik va 1 nafar turkiyalik fuqaroda kasallik aniqlangandi). Qashqadaryo viloyatida koronavirus infeksiyasidan davolanish ko‘rsatkichi 24-iyundagi 3 foizdan 13 foizga ko‘tarildi. Shunday bo‘lsa-da, eng yomon ko‘rsatkich hali ham Qashqadaryoga tegishli.

Hozirda kasallik qayd etilgan jami 7177 nafar bemordan 4877 nafari sog‘ayib, davolanish ko‘rsatkichi 68 foizni tashkil etmoqda. Davolanishning bu qadar past ko‘rsatkichi oxirgi marta 5-may kuni qayd etilgandi.

17-iyun kuni shifoxonalardagi bemorlar soni birinchi marta 1500 nafardan oshgandi, 23-iyunga kelib ularning soni 2000 nafardan ham oshdi. Ayni vaqtda shifoxonalardagi 2280 nafar bemordan 1872 nafari Toshkentdagi tibbiyot muassasalarida davolanmoqda (Sirdaryo viloyatidagi bemorlar ham Toshkent shahriga o‘tkazilgan). Qolgan 408 nafar bemor mamlakatning 10 hududidagi shifoxonalarda davolanmoqda.

Jizzaxda 2, Qoraqalpog‘istonda 7, Andijonda 14, Namanganda 24, Buxoroda 29, Surxondaryoda 30, Samarqandda 40, Xorazmda 56, Navoiyda 57 va Qashqadaryoda 160 nafar bemor qoldi. Farg‘ona viloyati koronavirusdan xoli yagona hudud bo‘lib turibdi.

Ahvoli og‘ir bemorlar va o‘lim holatlari

Ayni paytda tibbiyot muassasalarida davolanayotgan 2280 nafar bemordan 18 nafari og‘ir, 6 nafari esa o‘ta og‘ir ahvolda.

Sog‘liqni saqlash vazirligi 25-iyun davomida bir bemorning vafot etganini ma’lum qildi. Denov shahrida yashagan, 1961-yilda tug‘ilgan B.X. ismli ayol so‘nggi 5 yildan buyon o‘pkaning ikki tomonlama o‘tkir bronxopnevmoniyasi tashxisi bilan davolanib kelgan. Shu yilning 19-iyun kuni bemor murojaatiga ko‘ra olingan namunada koronavirus infeksiyasi mavjudligiga gumon qilingan va bemor tez yordam mashinasida tuman yuqumli kasalliklar shifoxonasiga yotqizilgan.

Shifoxonada bemorga ikki tomonlama o‘tkir bronxopnevmoniya, o‘tkir yurak va o‘pka yetishmovchiligining og‘ir darajasi, koronavirus infeksiyasiga gumon tashxisi qo‘yilgan. Bundan tashqari, bemorda o‘pkaning surunkali obstruktiv kasalligi, surunkali piyelonefrit, kamqonlikning o‘rta og‘ir darajasi tashxisi ham qo‘yilgan.

Bemor ayolga ko‘rsatilgan tezkor tibbiy yordam va reanimatsion muolajalarga qaramasdan, u yurak-qon tomir va o‘pka yetishmovchiligidan vafot etgan.

Sog‘liqni saqlash vazirligi bemorning qaysi kuni vafot etganini ma’lum qilmagan. Biroq 21-iyun kuni Denov tumani hokimi Baxtiyor Ibatov 21-iyun kuni tuman aholisiga murojaat qilib, tumanning bir fuqarosi 20-iyun kuni koronavirusdan vafot etganini ma’lum qilgan edi. Ushbu xabar hokimlikning Telegram kanalidan o‘chirib yuborilgan, biroq videolavha internetda tarqalishga ulgurgandi. O‘sha vaqtda Sog‘liqni saqlash vazirligi Denovda koronavirusdan o‘lim holati qayd etilganini tasdiqlamagandi. Qashqadaryo viloyatining Kitob tumani hokimligi ham 31-mayda o‘limi qayd etilgan fuqaro koronavirusdan vafot etganini 17-iyun kuni ma’lum qilgandi.

Denovda 59 yoshli ayolning o‘limidan so‘ng O‘zbekistonda SSV tasdiqlagan koronavirusdan vafot etganlar soni 20 nafarga yetdi.

Karantingadilar

Sog‘liqni saqlash vazirligi 25-iyun kuni karantindagilar soni haqida ma’lumot bermadi. 24-iyunda berilgan oxirgi axborotga ko‘ra, O‘zbekistonda uy karantinida 37 173 nafar, statsionar karantinda esa 22 890 nafar fuqaro tibbiy kuzatuvda bo‘lib turgandi.