O‘zbekistonda 22-iyun soat 23:00 dan 23-iyun soat 23:00 ga qadar koronavirusga chalinish bilan bog‘liq 201 ta holat qayd etildi. O‘zbekistonda to‘rtinchi marta bir kunda kasallanganlar soni 200 nafardan oshmoqda. Bu holatlarning barchasi iyun oyida sodir bo‘lgan (7-iyun — 237 kishi, 16-iyun — 230 kishi, 20-iyun — 207 kishi). 23-iyunda qayd etilgan yangi holatlardan so‘ng O‘zbekistonda koronavirusga chalinganlar soni 6662 nafarga yetdi.
Yangi kasallanish holatlari
Yangi kasallanganlarning- 168 nafari karantin muassasalarida;
- 30 nafari aholi orasida (Toshkent shahrida — 9 nafar, Xorazm viloyatida — 6 nafar, Qashqadaryo viloyatida — 4 nafar, Namangan viloyatida — 3 nafar, Toshkent viloyatida — 3 nafar, Andijon viloyatida — 2 nafar, Surxondaryo viloyatida — 2 nafar, Sirdaryo viloyatida — 1 nafar);
- 3 nafari xalqaro yuk tashuvchi avtomashina haydovchilari orasida (Toshkent viloyatida — 2 nafar, Sirdaryo viloyatida — 1 nafar) aniqlangan.
23-iyun kuni aholi orasida 30 ta holat qayd etildi. Bu 11-iyundan keyin aholi orasida kasallik aniqlanishi bo‘yicha eng yuqori natija. 11-iyunda aholi orasida 39 ta yangi holat aniqlanganidan so‘ng shu kungacha aholi orasidagi kasallanishlar soni 30 taga yetmayotgandi.
Toshkent shahri aholi orasida kasallik aniqlanishi bo‘yicha yana yetakchi bo‘ldi. Poytaxtda aniqlangan yangi holatlarning 18 tasi koronavirusga chalinganlar bilan muloqot qilganlar orasida, 9 tasi aholi orasida qayd etildi. Toshkent shahrida oxirgi marta 3-iyun kuni aholi orasida koronavirus aniqlanmagandi.
Xorazm viloyatida oxirgi vaqtlarda kasallik aniqlansa, kamida 10 kishidan koronavirus chiqmoqda. 15-iyun kuni 10 kishida, 19-iyun kuni 12 kishida, 20-iyun kuni 13 kishida, 23-iyun kuni esa 14 kishida koronavirus aniqlandi. Yangi holatlarning 8 tasi koronavirusga chalinganlar bilan muloqotda bo‘lib karantinga olinganlar orasida, 6 tasi aholi orasida aniqlandi.
Surxondaryo viloyatida 11 ta yangi kasallanish holati qayd etildi. May va iyun oylarida viloyat bir kunda buncha ko‘p kasallik aniqlanishi kuzatilmayotgandi. Yangi kasallanganlarning 9 nafari koronavirusga chalinganlar bilan muloqotda bo‘lib, karantinga olingan fuqarolar orasida, 2 nafari aholi orasida aniqlandi. 14-iyunda viloyatga koronavirus qaytgandi. Shundan buyon yangi kasallanganlar aniqlangan kunlarda aholi orasida ham kasallanish holatlari qayd etilmoqda. 14-iyun kuni 9 ta holatning bari, 17-iyun kuni 6 ta holatdan 2 tasi va 20-iyun kuni 4 tadan 1 tasi aholi orasida aniqlangandi.
Toshkent viloyatida aniqlangan holatlarning 4 tasi koronavirusga chalinganlar bilan muloqotda bo‘lganlar orasida, 3 tasi aholi orasida, 2 tasi xalqaro yuk tashuvchi mashina haydovchilari orasida aniqlandi. Viloyatda 7 kundan beri aholi orasida, 10 kundan beri xalqaro yuk tashuvchi mashinalar haydovchilari orasida uzluksiz ravishda kasallik aniqlanmoqda.
Sirdaryo viloyatida aniqlangan 8 ta holatdan 6 tasi koronavirusga chalinganlar bilan muloqotda bo‘lib, karantinga olinganlar orasida, bittasi aholi orasida va yana bittasi xalqaro yuk tashuvchi mashina haydovchisida qayd etildi.
Qashqadaryo viloyatida aniqlangan 7 ta holatdan 4 tasi aholi orasida, 3 tasi koronavirusga chalinganlar bilan muloqotda bo‘lib, karantinga olinganlar orasida aniqlandi. Qashqadaryoda aholi orasida bir kunda 4 ta holat qayd etilishi faqatgina bir marta — viloyatga koronavirus qaytgan 5-iyunda sodir bo‘lgandi.
Namangan viloyatida qayd etilgan 3 ta yangi holatning hammasi aholi orasida aniqlandi. Viloyatda 4 kun avval ham aholi orasida 3 ta holat qayd etilgandi.
Andijon viloyatida aniqlangan 3 ta holatdan 2 tasi aholi orasida, bittasi koronavirusga chalinganlar bilan muloqotda bo‘lib, karantinga olinganlar orasida aniqlandi. 20-iyun holatiga ko‘ra “yashil” hudud deb belgilangan Andijon viloyatida 21-iyun kuni ham aholi orasida kasallik aniqlangandi.
Samarqand viloyatida aniqlangan 3 ta holatning hammasi koronavirusga chalinganlar bilan muloqotda bo‘lib, karantinga olinganlar orasida aniqlandi. Viloyatda 17-iyundan beri hozirgacha aniqlangan 22 ta holatning 21 tasi karantindagi fuqarolarda, faqat bittasi aholi orasida qayd etildi.
Qoraqalpog‘istonda qayd etilgan bitta holatham koronavirusga chalinganlar bilan muloqotda bo‘lib, karantinga olinganlar orasida aniqlandi. Ushbu hududda oxirgi marta yangi kasallanish holati 13-iyunda qayd etilgandi. O‘sha kuni aholi orasida 3 ta, xalqaro yuk tashuvchi mashina haydovchilari orasida bitta holat aniqlangandi.
Buxoro, Navoiy hamda koronavirusdan xoli bo‘lgan Jizzax va Farg‘ona viloyatlarida 23-iyun kuni kasallanish holatlari kuzatilmadi.
Kasallikdan davolanish
23-iyun davomida 110 nafar fuqaro sog‘aydi. Ulardan 109 nafari Toshkent shahridagi va 1 nafari Samarqand viloyatidagi tibbiyot muassasalarida shifo topdi.Hozirda kasallik qayd etilgan jami 6662 nafar bemordan 4560 nafari sog‘ayib, davolanish ko‘rsatkichi 68 foizni tashkil etmoqda. Davolanishning bu qadar past ko‘rsatkichi oxirgi marta 5-may kuni qayd etilgandi.
17-iyun kuni shifoxonalardagi bemorlar soni birinchi marta 1500 nafardan oshgandi, 23-iyunga kelib ularning soni 2000 nafardan ham oshdi. Ayni vaqtda shifoxonalardagi 2083 nafar bemordan 1656 nafari Toshkentdagi tibbiyot muassasalarida davolanmoqda (Sirdaryo viloyatidagi bemorlar ham Toshkent shahriga o‘tkazilgan). Qolgan 427 nafar bemor mamlakatning 9 hududidagi shifoxonalarda davolanmoqda.
Qoraqalpog‘istonda 7, Andijonda 14, Samarqandda 28, Namanganda 28, Surxondaryoda 30, Buxoroda 35, Navoiyda 52, Xorazmda 56 va Qashqadaryoda 177 nafar bemor qoldi. Jizzax va Farg‘ona viloyatlari koronavirusdan xoli hudud bo‘lib turibdi.
Sog‘liqni saqlash vazirligining ma’lum qilishicha, koronavirus infeksiyasini erta aniqlash ko‘lamini kengaytirish va tarqalishining oldini olish maqsadida, shuningdek, qator tashkilot va fuqarolarning bu haqdagi murojaatlarini e’tiborga olib, 24-iyundan boshlab davlat va nodavlat tashkilotlari xodimlari hamda fuqarolar uchun ushbu infeksiyaga tahlil topshirishda ixtiyoriy, pulli asosda nodavlat tibbiyot tashkilotlari xizmatlaridan ham foydalanish imkoniyati yaratildi.
Laborator tahlil uchun namuna (surtmalar) nodavlat tibbiyot tashkilotining o‘zida, shu bilan birgalikda, so‘rovga ko‘ra, murojaat qiluvchining tashkilotida, fuqarolarning yashash manzilida hamda maxsus avtotransportlarda olinishiga ruxsat berildi.
Mavzuga doir:
Ahvoli og‘ir bemorlar va o‘lim holatlari
Ayni paytda tibbiyot muassasalarida davolanayotgan 2083 nafar bemordan 17 nafari og‘ir, 4 nafari esa o‘ta og‘ir ahvolda. Bir sutka ichida ahvoli og‘ir bemorlar soni 2 nafarga oshdi. Ahvoli og‘ir va o‘ta og‘ir bemorlar soni birgalikda hech qachon 21 nafarni tashkil etmagandi.15-martda epidemiya boshlanganidan beri O‘zbekistonda 19 nafar bemor COVID-19 asoratlari oqibatida vafot etgan. 19-bemorning vafoti haqida 10-iyun kuni xabar berilgandi. Kitob va Denov tumanlari hokimliklari ham o‘z hududlarida koronavirus oqibatida bir nafardan bemor hayotdan ko‘z yumgani haqida xabar qilgan. Lekin Sog‘liqni saqlash vazirligi ushbu holatlarni tasdiqlamagan va qurbonlar soniga o‘zgartirish kiritmagan.
Izoh (0)