Toshkentdagi yerusti metro yo‘nalishining “Choshtepa” bekati Sergeli tumani Choshtepa 11-berk ko‘chasidan o‘tayotgan qismida yashayotgan aholi uylarida kuniga 24 soatlab yer qimirlashidan shikoyat qilmoqda, deb xabar beradi “Xabar.uz”.
Mahalla aholisining so‘zlariga ko‘ra, ushbu hudud 2017-yildan buyon “snos”ga tushgan. Aynan metro yo‘lining o‘tish qismidagi uylar buzilgan. Hozirda ushbu liniyaga juda yaqin (taxminan 10 metr masofada) 20 tacha xonadon qolgan.
“Mahallaga kirish yo‘li abgor ahvolda. Hatto yo‘l yo‘q desa ham bo‘ladi. Na kanalizatsiyasi bor, na biror infratuzilma. Hamma yoq tuproq va chang”, — deyiladi xabarda.
Metro qurilishi uch smenada olib borilayotgani tufayli ishchilar yirik texnikalarda 24 soat ishlamoqda. Taxminan 10-iyundan buyon ushbu bekatdagi yerusti metrosi ustunlari orasi bino qurish uchun qazilib, 60-80 tonnalik texnikalarda tuproqni jipslash (trambovka) ishlarini olib borilyapti.
Ta’kidlanishicha, buning oqibatida ushbu hududga yaqin barcha uylarda devorlar, eshik, deraza, darvoza, mebellar kun davomida tinimsiz qimirlab ovoz chiqarmoqda. “Xuddi 2-3 ballik zilzilada kun bo‘yi o‘tirgandek his qilasiz o‘zingizni. Bir necha soniya davom etadigan zilzilada odamlar qanchalik yurak hovuchlab qolishini yaxshi bilasiz. Endi tasavvur qiling, bu yerlik aholi bir necha kundan beri shunday holatni boshidan kechirishyapti”, — deydi mahalla aholisi.
Bir necha marotaba qurilish tashkiloti rahbarlariga hozirgi karantin davrida qariyalar, bolalar uydaligi, bu yer titrashidan umuman dam olib bo‘lmayotgani tushuntirilgan. Lekin bundan hech qanday natija bo‘lmagan.
Izoh (0)