Ispaniya chempionatining 30-turi doirasida o‘tkazilgan “Sevilya” — “Barselona” uchrashuvda (0:0) Lionel Messi va Diyego Karlos o‘rtasida to‘qnashuv yuz berdi.
Birinchi bo‘lim oxirlarida mehmonlar a’zosi Jyul Kunde “Barselona” hujumchisi Luis Suaresga nisbatan qo‘pollik ishlatdi. Messi esa yonida paydo bo‘lgan Diyego Karlosga e’tiroz bildirdi. Shundan so‘ng futbolchilar o‘rtasida janjal boshlanib ketib, Messi Karlosni turtib yuboradi, u esa maydonga yiqiladi. Har ikkala jamoaning qolgan futbolchilari ham janjalga aralashadi. Hakam esa yakunda Serxio Buskets va Fernandoga sariq kartochka ko‘rsatib, vaziyatni o‘z nazoratiga oladi.
Uchrashuvni Xose Luis Gonsales Gonsales boshchiligidagi hakamlar guruhi boshqarib bordi.
Eslatib o‘tamiz, joriy mavsumning birinchi davrasidagi “Barselona” — “Sevilya” o‘yini 4:0 hisobida katalon klubi foydasiga hal bo‘lgan.
“Barselona” 65 ochko bilan musobaqa jadvalining birinchi pog‘onasini egallab turibdi. Bitta kam o‘yin o‘tkazib, ikkinchi o‘rinda borayotgan “Real”da esa 62 ochko bor. Kuchli uchlikni “Sevilya” (52) yakunlagan.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)