Britaniyada joylashgan tezkor xizmat ko‘rsatuvchi KFC restoraniga bir erkak ot aravada kelib, mashinadagi mijozlarga mo‘ljallangan oyna orqali ovqat buyurtma qilmoqchi bo‘lgan, biroq rahbariyat erkakka rad javobini bergan, deb xabar qiladi Motor.
Jo-Jo laqabli poni otida KFC’ga kelgan 55 yoshli Yan Bellning so‘zlariga ko‘ra, u mazkur mojarodan so‘ng o‘zini xo‘rlangandek his qilgan. Erkakning aytishicha, u hech qanday qonunbuzarlik qilmagan, shunchaki ovqatlanish niyatida bo‘lgan.
Ta’kidlanishicha, Yan Bell tez-tez ot aravada sayr qilib turadi. Tos suyagidagi jarohat sabab u yurishga yoki mashina boshqarishga qiynaladi, shu sababli ot arava erkakning an’anaviy sayr usuli o‘rnini egallagan.
KFC rahbariyatining ma’lum qilishicha, ular ot aravadagi mijozlarga xizmat ko‘rsata olmaydi, chunki bu xavfsizlik qoidalariga zid. Biroq Bell mojarodan so‘ng yo‘l olgan qo‘shni “Makdonalds” erkakka hech bir e’tirozsiz xizmat ko‘rsatgan.
KFC shtab-kvartirasi mazkur holatga munosabat bildirib, o‘z menejerlarini himoya qilgan. Endilikda Bell bu kabi holatda Burger King xodimlari qanday yo‘l tutishini tekshirib ko‘rish niyatida.
Eslatib o‘tamiz, 2018-yilning sentabrida Toshkentda ham KFC restorani ish boshlagan.
Izoh (0)