Andijon viloyati Marhamat tumanida bir necha fuqaroga tadbirkorlik uchun yer ajratib berish evaziga 8250 dollar, bir kishiga ikki xonali uy olib berish uchun 27 million so‘m olgan mas’ul shaxs fosh etildi. Bu haqda “Daryo”ga Bosh prokuratura tomonidan ma’lum qilindi.
Xabar berilishicha, mazkur holat Bosh prokuratura huzuridagi Iqtisodiy jinoyatlarga qarshi kurash departamentining Marhamat tuman bo‘limi tomonidan DXX xodimlari bilan hamkorlikda o‘tkazilgan tezkor tadbirda aniqlangan.
Ma’lum bo‘lishicha, Andijon viloyati kichik sanoat zonalarini boshqarish yagona direksiyasi Marhamat tumani yetakchi mutaxassisi D.A. firibgarlik yo‘li bilan daromad orttirish maqsadida fuqaro B.M.ning ishonchiga kirib, unga tuman hududidagi kichik sanoat zonasi uchun ajratilgan yer maydonidan uy-joy qurish hamda tadbirkorlik faoliyati bilan shug‘ullanishi uchun 10 sotix yer maydoni ajratib berishni aytgan va buning evaziga 1500 dollar talab qilgan. Mas’ul xodim mazkur pullarni olgan vaqtida ashyoviy dalil bilan ushlangan.
Shuningdek, ushbu holat bo‘yicha o‘tkazilgan tergovga qadar tekshiruvda yetakchi mutaxassis D.A. 2020-yilning may oyida to‘rt nafar fuqaroning ishonchiga kirib, tadbirkorlik faoliyatini boshlashga yer ajaratish uchun 6750 dollarni hamda bir kishiga tumanda qurilayotgan ko‘p qavatli uydan 2 xonali uy olib berish evaziga 27 million so‘mni qo‘lga kiritganligi aniqlangan.
Mazkur holatlar yuzasidan D.A.ga nisbatan Jinoyat kodeksining 168-moddasi bilan jinoyat ishlari qo‘zg‘atilib, tergov harakatlari o‘tkazilmoqda.
Mavzuga doir:
- Farg‘onada qurilish obyektini olib berishi evaziga 5 ming dollar so‘ragan qishloq xo‘jaligi hisobchisi firibgarlik ustida ushlandi
- Toshkent davlat agrar universiteti Andijon filialiga 2 ming dollarga o‘qishga kiritib qo‘ymoqchi bo‘lgan sobiq o‘qituvchi ushlandi
- Namanganda universitetga o‘qishga kiritishni va’da qilib, 2,5 ming dollar va 5 mln so‘m talab qilgan firibgar o‘qituvchi qo‘lga tushdi
Izoh (0)