Qarshi tuman kengashi deputati: “Siz jurnalistlar noto‘g‘ri xabar tarqatib, hokimiyatga ishonchsizlik uyg‘otyapsiz”.

Qarshi tuman hokimligi axborot xizmati xabariga ko‘ra, Xalq deputatlari tuman kengashining oltinchi chaqiriq, o‘ninchi sessiyasida jurnalistlar va ijtimoiy tarmoq foydalanuvchilarining tanobini tortib qo‘yish masalasi ham muhokama qilingan.

“Sessiya ishida jamiyatimizda biroz og‘riq nuqtaga aylangan ommaviy axborot vositalari va ijtimoiy tarmoqlarda asoslanmagan xabarlarni tarqatish, hokimiyat vakillik organlari qadr-qimmati, sha’nini qadrsizlantirish, faoliyatlariga noto‘g‘ri baho berish kabi salbiy illatlar haqida tuman kengashi deputatlarining fikri tinglandi. Mazkur holatlarga yo‘l qo‘ymaslik, qaysi ijtimoiy tarmoq bo‘lishidan qat’i nazar, qonun oldida javobgarligi borligi eslatib o‘tildi. Adliya bo‘limi va Xalq deputatlari tuman kengashining doimiy komissiyasi tomonidan qonunlarda belgilangan tartibda munosabat bildirib borish, prokuratura organi tomonidan huquqiy baho berish hamda javobgarligini ta’minlash vazifalari belgilab olindi”, — deyiladi hokimlik axborot xizmati tarqatgan xabarda.

Sessiya ishida ishtirok etgan deputat Feruza Ahmedova “Daryo” muxbiri bilan suhbati davomida sud ishini yoritgan jurnalistlarni xalq ma’naviyatiga ta’sir qilish va hokimiyatga nisbatan ishonchsizlik uyg‘otishda aybladi.

“Sulton Tex Group ishini piar qildinglar, sizlarga shu kerak edi-da, — deydi deputat Feruza Ahmedova. — Siz jurnalistlar noto‘g‘ri xabar tarqatib, xalq ma’naviyatiga ta’sir qilyapsizlar, hokimiyatga ishonchsizlik uyg‘otyapsizlar”.

Muxbir deputatdan sud jarayonida yoritilgan xabarlarning qaysi biri xato ekanligini so‘radi.

“Hokim klaster faoliyatiga aralashyapti, pul so‘rayapti, Akrom Aripov qizishdi, deb noto‘g‘ri xabar beryapsizlar. Aslida hokim fermerlarning qolib ketgan pulini so‘ragan ekan-ku”, — deydi deputat Feruza Ahmedova.

Eslatib o‘tamiz, Qarshi tumani hokimi Maqsuda Mustafoyeva bosh vazir o‘rinbosari O‘ktam Barnoyev hamda Qashqadaryo hokimi Zoir Mirzayevga yozgan xatida klaster rahbari kombaynlar ta’miri va g‘alla hosildorligini oshirish uchun berilishi lozim bo‘lgan 5 milliard 636 million so‘m pulni to‘lab bermayotganini yozgandi. Hokim o‘rinbosari Akrom Aripov esa hokim bilan birga klaster rahbari Nurbek Ergashev yoniga borib, shu pulni berishini so‘raganini tan olgandi. Sud mazkur jarayonga munosabat bildirar ekan, hokimning ushbu xatti-harakatini qonunga xilof deb atagandi.

Sessiya ishida ishtirok etgan deputat Dilorom Tilakovaning tan olishicha, u sud qaroridan bexabar. Sud qarori haqida sessiyada og‘zaki ma’lumot berilgan.

“Internet saytlari sud qarorini noto‘g‘ri talqin qildi. Masalan qarorda taqiq qo‘yildi, aralashmaydigan qilindi (hokimning klaster faoliyatiga aralashuvi nazarda tutilmoqda — tahr. izohi) deyilmagan deyishdi-ku”, — deydi deputat.

Ta’kidlash joizki, klaster va hokimlik o‘rtasidagi muammoni ko‘rib chiqqan sud Qarshi tuman hokimi va hokimlik mansabdor shaxslariga klaster faoliyatiga aralashish, uning 2020-yil uchun fermerlar bilan tuzgan shartnomasini bekor qilish yoki o‘zgartirishga urinishini taqiqlab qo‘ygandi.

Dilorom Tilakovaning aytishicha, sessiyada faqatgina klaster faoliyatidan norozi fermerlar qatnashgan.