Afsonaviy basketbolchi Kobi Brayant Los-Anjeles rivojiga qo‘shgan hissalari uchun “Emmi” mukofotiga loyiq ko‘rildi.

Ta’kidlanishicha, Brayant basketboldagi yutuqlaridan tashqari xayriya ishlarida faol bo‘lgan, Los-Anjeles va Janubiy Kaliforniya aholisi uchun ilhom bag‘ishlovchi shaxs sifatida gavdalangan. Xabar qilinishicha, mukofot 18-iyul kuni marhumning oila a’zolariga topshiriladi.

Eslatib o‘tamiz, 26-yanvar kuni Brayant va uning 13 yoshli qizi vertolyot halokati oqibatida vafot etgan. Vertolyot bortida bo‘lgan yana yetti kishi ham voqea joyida hayotdan ko‘z yumgandi.

Ma’lumot uchun, Kobi “Oskar”mukofotiga ham sazovor bo‘lgan. Uning “Qadrli basketbol” deb nomlagan filmi 2018-yilda eng yaxshi qisqametrajli multfilm deb topilgandi.

2016-yilda faoliyatini yakunlagan Brayant 20 mavsum davomida “Los-Anjeles Leykers”da harakat qilgan va jamoasi bilan besh karra NBA chempionligini qo‘lga kiritgan. U shuningdek, AQSh basketbol terma jamoasi bilan 2008 va 2012-yilgi yozgi Olimpiada o‘yinlari g‘olibiga aylangan.