Zara, Bershka, Pull & Bear va Massimo Dutti brendlariga egalik qiluvchi Ispaniyaning Inditex kompaniyasi 1000-1200 ta do‘konini yopadi. Bu haqda kompaniya hisobotida aytib o‘tilgan.
Ma’lum qilinishicha, gap yaxshi joylarda joylashmagan kichik do‘konlar haqida ketmoqda. Ularning ko‘pchiligi Zara do‘konlari hisoblanadi. Shu bilan birga, Inditex 450 ta yangi do‘kon ochadi.
Bu rejalar 2020—2022-yillarda amalga oshiriladi. Natijada Inditex o‘z savdo tarmog‘ini hozirgi 7412 ta do‘kondan 6700-6900 ta do‘konga kamaytiradi.
Ma’lum qilinishicha, Inditex onlayn savdoni rivojlantirishni ko‘zlamoqda. 2019-yilning kuzida uning ulushi kompaniya daromadlarining 19 foizini tashkil qilgan. 2022-yilga borib onlayn savdo ulushini 25 foizga yetkazish rejalashtirilmoqda.
Inditex karantin cheklovlari sababli turli mamlakatlardagi, taxminan, 6500 ta do‘konini yopgan. Ularning, taxminan, 1500 tasi hali ham ishlamayapti.
Kompaniyaning daromadi 2020-yilning fevral—aprel oylarida 44 foizga kamayib, 3,3 milliard yevroga tushgan. Onlayn savdo esa birinchi chorak davomida 50 foizga, aprel oyida esa 95 foizga o‘sgan.
Eslatib o‘tamiz, Inditex kompaniyasi asoschisi Amansio Ortega koronavirus sababli mart oyida bir hafta ichida 12,8 milliard dollar zarar ko‘rgandi. U 2010-yildan 2020-yilga qadar 49,9 milliard dollarga boyigan.
Izoh (0)