Sulton Tex Group ishini ko‘rgan sud Qarshi tuman adliya bo‘limiga fermerlar va paxta tozalash zavodi aksiyadorlarining huquqiy savodxonligini oshirishni tavsiya qildi

Qashqadaryo viloyati Qarshi tumanidagi Sulton Tex Group ishi bo‘yicha bo‘lib o‘tgan sud majlisi yakunida Qarshi tuman adliya bo‘limiga fermerlar va paxta tozalash zavodi aksiyadorlarining huquqiy savodxonligini oshirish tavsiya qilindi.

Mazkur sud majlisida qatnashgan “Daryo” muxbirining ma’lum qilishicha, bu haqda sud ajrimi chiqqan bo‘lib, tuman adliya bo‘limi bir oy davomida fermerlar va tuman paxta tozalash zavodi aksiyadorlari uchun o‘quv-seminar o‘tkazib, bu haqda sudni xabardor qilishi lozimligi belgilandi.

Qarshi tuman Ma’muriy sudi tuman adliya bo‘limiga paxta tozalash zavodi aksiyadorlariga O‘zbekiston Respublikasining 2014–yil 6-maydagi “Aksiyadorlik jamiyatlari va aksiyadorlarning huquqlarini himoya qilish to‘g‘risida”gi qonuni mazmunini va aksiyadorlarning kuzatuv kengashi vakolati hamda jamiyat qoshida tobe jamiyat tashkil etish tartibi mavzusida o‘quv seminar tashkil etishni tavsiya qildi.

Tumandagi fermer va dehqon xo‘jaligi rahbarlariga esa Fuqarolik kodeksi talablaridan kelib chiqib, xo‘jalik yurituvchi subyektlar o‘rtasidagi kontarktatsiya shartnomalarini tuzish va bu shartnomalarni bekor qilish yoki o‘zgartirish tartibi haqida ma’ruzalar qilish taklifi berildi.

Eslatib o‘tamiz, Qarshi tumanidagi mavjud fermer xo‘jaligi rahbarlari 2020-yil boshida Sulton Tex Group klasteri bilan shartnoma imzolagan va mazkur shartnoma o‘z kuchini yo‘qotmagan bo‘lishiga qaramasdan yangi tashkil etilishi ko‘zda tutilgan, ammo hali shakllanmagan kooperatsiya deb atalgan MChJ bilan shartnoma tuzishga majburlangandi. Bu haqda “Daryo” muxbiri bilan suhbatlashgan fermerlarning aytishicha, tuman hokimligi mas’ullari, xususan, hokim o‘rinbosari Akrom Aripov fermerlarga yangi tashkil etilgan kooperatsiya bilan shartnoma tuzmasa, yeri olib qo‘yilishi mumkinligini aytib qo‘rqitgan.

Mazkur masala yuzasidan jurnalistik surishtiruv olib borgan “Daryo” muxbiri tumandagi fermer xo‘jaligi rahbarlari bo‘sh shartnomaga imzo qo‘yishga majburlangani haqida xabar bergandi.