Xorazm viloyatida Tuproqqal’a tumanidagi kanaldan olib chiqilgan Tico’dan 34 yoshli yigitning murdasi topildi. Bu haqda Bosh prokuratura matbuot xizmati “Daryo”ga ma’lum qildi.
Xabarga ko‘ra, Hazorasp tuman prokurori tomonidan 2020-yil 17-aprel kuni T.Q.ning bedarak yo‘qolganligi holati yuzasidan Jinoyat kodeksining 97-moddasi 1-qismi bilan jinoyat ishi qo‘zg‘atilgan.
Hazorasp tumani “Temirchi maskani” MFYda yashovchi 1986-yilda tug‘ilgan T.Q. 2020-yil 27-mart kuni, taxminan, soat 10:00 larda otasiga tegishli Tico mashinasida ko‘chaga chiqib ketib, uyga qaytib kelmagan.
Mazkur jinoyat ishi bo‘yicha olib borilgan tergov harakatlari davomida to‘plangan dalillarga ko‘ra, T.Q. Tuproqqal’a tumanidagi Toshsaqa kanalining Chap qirg‘oq suv inshooti hududida mobil telefonidan foydalangani inobatga olinib, 4-iyun kuni ushbu kanal hududida suv to‘silib, olib borilgan qidiruv ishlarida fuqaroning jasadi Tico’da bo‘ynidan zanjir bilan rul chambaragiga qulflangan holda topilgan.
Murda sud-tibbiy ekspertizasida ko‘zdan kechirilganida uning tanasida jarohat izlari aniqlanmagan. T.Q.ning o‘limi yuzasidan sud-tibbiy ekspertizasi tayinlangan va tergov harakatlari olib borilmoqda, deyiladi xabarda.
Mavzuga doir:
- Jalaquduqda ayol o‘zini kanalga tashlab, halok bo‘ldi. Unda ruhiy xastalik bo‘lgani aytilmoqda
- Toshkent shahar prokuraturasi Bo‘rijar kanalidan jasadi topilgan ayol bo‘yicha ma’lumot berdi
- Zangiotada 18 yoshli qizni pichoqlab, kanalga tashlab yuborganlar qo‘lga olindi. Qiz omon qoldi
- Samarqandda o‘z joniga qasd qilgani aytilgan 69 yoshli ayol qarindoshlari tomonidan dafn etildi. Prokuratura qasddan odam o‘ldirish moddasi bo‘yicha jinoiy ish ochdi
Izoh (0)