Saudiya Arabistoni Sog‘liqni saqlash vazirligi o‘tgan bir sutka davomida koronavirus bilan kasallanish holati bo‘yicha rekord ko‘rsatkichni qayd etdi — 3121 kishi. Butun mamlakat bo‘ylab COVID-19’ga chalinganlar soni 100 mingga yaqinlashib qoldi, deb xabar beradi “RIA Novosti”.

Foto: AP Photo

Ma’lumotlarga ko‘ra, o‘tgan bir sutka davomida koronavirus bilan kasallangan 34 bemor vafot etgan. Shunday qilib, mamlakatda COVID-19 qurbonlari soni 676 kishiga yetdi.

“Shuningdek, yana 3121 kishining koronavirusga tahlili ijobiy chiqdi. Mamlakat bo‘ylab virusga chalinganlar soni 98 869 kishini tashkil etmoqda”, — deyiladi xabarda.

Mamlakat Sog‘liqni saqlash vazirligining kunlik hisobotiga ko‘ra, podshohlikda o‘tgan bir sutka davomida 1175 kishi sog‘aygan bo‘lib, Saudiya Arabistonida koronavirusdan davolanishga muvaffaq bo‘lganlar soni 71 791 kishiga yetgan.

Ta’kidlash kerakki, Saudiya Arabistoni koronavirusga chalingalar bo‘yicha arab davlatlari orasida birinchi, dunyoda esa 15-o‘rinda ketmoqda.

Eslatib o‘tamiz, koronavirus sabab Saudiya Arabistonida 23-martdan boshlab shaharlar aholisining harakatlanishiga taqiq kiritilgan bo‘lib, soat 19:00 dan 06:00 ga qadar komendantlik soati joriy etilgan. Mazkur cheklov 21 kun davomida amalda bo‘lishi belgilangan edi. Aprel oyining oxirlarida komendantlik soati qisman bekor qilinishi ma’lum bo‘lgandi.