Yangi BMW 4-Series’ning premyerasidan bir necha kun o‘tib, internetda BMW M4’ning surati tarqala boshladi. Hozircha ushbu surat qayerda tushirilgani noma’lum, biroq BMW M markazlaridan biriga o‘xshaydi, deb xabar beradi Carakoom.

Foto: Carakoom

Avtomobil old qismining eng ko‘zga tashlanadigan qismi, albatta, radiator panjarasi uchun ajratilgan “teshik”ning kattargani. 4-Series’ning oddiy variantlariga uch o‘lchamli dizaynga ega ancha murakkab panjaralar o‘rnatilgan bo‘lsa, M4’niki gorizontal plankalar hisobiga biroz oddiy ko‘rinish kasb etgan.

Qo‘shimcha havo aylantirgichlar asosiy panjaraning yon tomonlarida joylashgan, old faralar esa o‘zgarishsiz qolgandek. Old bamperning tashqi chetlari deyarli bo‘sh, faqat ayrim vertikal kanallarni ilg‘ash mumkin. Taxminlarga ko‘ra, bu old tormozlarni sovutishga mo‘ljallangan kanallar yoki yopiq plastik bo‘lagi.

Foto: Carakoom

Yangi M4 dizaynining o‘ziga xos bir jihati bor — bu old oynaga qadar tortilgan radiator panjarasining biroz tepa qismidan boshlanuvchi ikkita ingichka chuqurchasi.

Ma’lumotlarga ko‘ra, BMW M4’ga xuddi X3 M va X4 M’dagi kabi 3,0 litrli olti silindrga ega S58 motori o‘rnatilgan. U standart variantda 473 ot kuchini, Competition versiyasida esa 503 ot kuchini hosil qiladi.