Sayxunobod tumani tibbiyot xodimlarining kaltaklanishi bilan bog‘liq voqealar bo‘yicha olib borilgan tergov hamda surishtiruv ishlarining tafsilotlari haqida rasmiy ma’lumot berildi. Bu haqda Bosh prokuratura matbuot xizmati xabar bermoqda.
Xabarga ko‘ra, mazkur holat yuzasidan Sayxunobod tumani IIB huzuridagi tergov guruhi tomonidan tergovga qadar tekshiruv harakatlari o‘tkazilib, natijada Jinoyat kodeksining 277-moddasi (Bezorilik) 2-qismi “a” bandi bilan jinoyat ishi qo‘zg‘atilgan. Jinoyat ishi bo‘yicha asosiy gumondor protsessual tartibda ushlangan. Hozirda jinoyat ishi bo‘yicha dastlabki tergov harakatlari davom etmoqda.
Bayonotda sog‘liqni saqlash vaziri shifokorlarga qilinayotgan tajovuzlar bo‘yicha Bosh prokuraturaga avval ham murojaat qilgani, biroq muammo hal etilmagani mazmuni aks etgan xabarlarga ham to‘xtalib o‘tilgan.
Ta’kidlanishicha, bunday ma’lumotlar hech qanday asosga emas. Nafaqat shifokorlarga, balki har bir fuqaroga qilingan tajovuz, ularning sog‘lig‘i yoki mulkiga qaratilgan har qanday noqonuniy xatti-harakatlar qonun doirasida hal qilib kelinmoqda. Shunday ekan, bu borada qonun ustuvorligi va jazo muqarrarligi ta’minlanishida shubhaga o‘rin yo‘q, deyilgan Bosh prokuraturaning SSVga yozgan javob xatida.
5-iyun kuni Sirdaryoda 6 nafar mast fuqaro tez yordam xodimlarini kaltaklagani xabar qilingan, SSV bosh prokurordan Sirdaryoda tez yordam xodimlarini kaltaklagan mast fuqarolarni qattiq javobgarlikka tortishni so‘ragandi.