Prezident Shavkat Mirziyoyev Farg‘ona viloyatiga tashrifi chog‘ida Toshloq tumanidagi “Uz-Segang” qo‘shma korxonasida ish jarayoni bilan tanishdi. Bu haqda Prezident matbuot xizmati xabar berdi.
Ta’kidlanishicha, Farg‘ona viloyatidagi 6 ta ixtisoslashgan tumanda 20 ta meva-sabzavotchilik va uzumchilik klasteri tashkil etilgan. Bu yil ularda 288 ming tonna mahsulot yetishtirilib, 120 ming tonnasini eksportga yo‘naltirish rejalashtirilgan. Buning uchun sig‘imi 330 ming tonnadan ortiq bo‘lgan muzlatkichli omborxonalar, 25 ta logistika markazi, 90 ta qayta ishlovchi korxona faoliyat ko‘rsatmoqda.
Qayd etilishicha, Italiyaning ICEOL texnologiyasi gilosni rangi va kattaligi bo‘yicha saralab qadoqlaydi. Sifatsizlarini lazer nuri orqali aniqlab, alohida joylaydi. Janubiy Koreyadan keltirilgan SNP liniyasi anorni xuddi shunday saralaydi. Mevaning ichidagi pishmagan yoki chiriy boshlagan joyni ham aniq ko‘rsatadi. Korxona mahsulotlari “Global G.A.P.” xalqaro sertifikatiga ega.
Prezident bu korxonani doimiy xomashyo bilan ta’minlash masalasiga ahamiyat qaratdi. Buning uchun unga hududdagi bog‘larni biriktirish, yangi bog‘lar va laboratoriya tashkil etish bo‘yicha ko‘rsatmalar berdi.
Izoh (0)