Buxoro viloyatining Shofirkon tumanida koronavirus infeksiyasi tarqalishining oldini olish va unga qarshi kurashish bo‘yicha tuzilgan shtabning “Daryo”ga xabar berishicha, shofirkonlik A. ismli ayol koronavirus yuqtirgani tasdiqlangan bo‘lsa-da, olib borilgan suhbat jarayonida u kimlar bilan muloqotda bo‘lganini yashirgan. Oqibatda kasallik boshqalarga ham tarqalib ulgurgan va 15 nafarga yaqin fuqaro karantinga olingan.
“Bu shtab a’zolari tomonidan A. bilan muloqot qilgan fuqarolarni tahlildan o‘tkazish va karantinga olish ishlarida qiyinchilik tug‘dirgan hamda ko‘p vaqt sarf bo‘lishiga sababchi bo‘lgan. Yo‘qotilgan vaqt orasida esa A. bilan muloqotda bo‘lganlar ham yana bir nechta fuqarolar bilan suhbatga kirishgan bo‘lishi ehtimoldan xoli emas”, — deyiladi shtab xabarida.
Hozirda fuqaroga nisbatan surishtiruv ishlari olib borilib, uning necha kishi bilan muloqotda bo‘lgani o‘rganilmoqda.
Shtabning qo‘shimcha qilishicha, tumanda fuqarolar o‘rtasida olib borilgan ogohlantirishlarga qaramasdan, karantin qoidalarini buzib, niqobsiz yurganlar ham uchramoqda. Bunga qarshi esa huquq-tartibot idoralari tomonidan qonun talablari asosida ta’sir choralari ko‘rilmoqda.
“Xususan, ‘Talisafed’, ‘Xo‘ja Orif’, ‘Nurafshon’, ‘Savrak’, ‘Yangi qishloq’, ‘Iskogari’, ‘Chuqurak’, ‘Jo‘ynav’, ‘Gulomte’ mahalla aholisi himoya niqoblarisiz ko‘chada harakatlangani uchun mazkur hudud fuqarolariga nisbatan qat’iy choralar belgilanadi”, — deydi shtab mas’ullari.
Eslatib o‘tamiz, koronavirus xavfi sabab tuman qizil hududga kiritilib, tumanga kirib-chiqish to‘xtatilgandi.
Izoh (0)