Favqulodda vaziyatlar vazirligi tomonidan zararli chigirtkalarning kirib kelishini oldini olish va bartaraf etish bo‘yicha qator tadbirlar tashkil etilmoqda. Bu haqda vazirlik xabarida ma’lum qilindi.

Foto: FVV matbuot xizmati

Qayd etilishicha, bugungi kunda respublika bo‘yicha zararli chigirtkalarni 327,4 ming gektar maydonda tarqalganligi aniqlanib, 309,6 ming gektar maydonda kimyoviy ishlovlar o‘tkazildi.

2020-yilda zararli chigirtkalarni respublika hududiga kirib kelishining oldini olish uchun joylarda 597,9 ming gektarda kimyoviy ishlov o‘tkazilishi rejalashtirilgan.

Shuningdek, mahalliy budjetdan ajratilgan mablag‘lar hisobidan bugungi kungacha zararli chigirtkalarga qarshi 397 ming gektar maydonda ishlovlarni o‘tkazishni ta’minlaydigan kimyoviy vositalar zahirasi yaratilgan.

Ushbu tadbirlarga 500 dan ortiq maxsus texnikalar va 700 nafardan ortiq ishchilar jalb qilingan.

Foto: FVV matbuot xizmati

Xabarda aytilishicha, bu ishlar qo‘shni davlatlar, jumladan, Qozog‘iston, Turkmaniston hamda Qirg‘iziston respublikalari bilan hamkorlikda olib borilmoqda.

Avvalroq Markaziy Osiyo davlatlariga chigirtkalar yopirilishi kutilayotgani, Turkmaniston prezidenti zararkunandalarga qarshi kurashish bo‘yicha topshiriq bergani xabar berilgan edi.

“O‘zagrohimoya” kompaniyasi yetakchi mutaxassisi O‘tkir Mirzayev esa O‘zbekiston hududiga chigirtkalarning katta miqdordagi zararli to‘dasi kirib kelgani haqida ma’lumot kelib tushmagani, hozirgi vaqtda bunday xavf yo‘qligini ma’lum qilgandi. Shuningdek, chegara hududlarda maxsus texnikalar shay turgani, chigirtkalarning har qanday xavfli to‘dasini yo‘q qilish uchun texnik imkoniyatlari ham, kimyoviy dori vositalar ham yetarli ekanligini ta’kidlagandi.