O‘zbekiston fuqarolarini xorijdan olib kelish maqsadida tasdiqlangan charter reyslar jadvaliga muvofiq, 1—2-iyun kunlari Toshkent—Istanbul—Toshkent, Toshkent—Moskva—Toshkent yo‘nalishlarida amalga oshirilgan parvozlar orqali 677 nafar fuqaro O‘zbekistonga olib kelindi. Bu haqda Transport vazirligi xabar berdi.

Foto: Transport vazirligi matbuot xizmati

Ma’lum qilinishicha, 3-iyun kuni Toshkent—Sharja—Toshkent hamda Toshkent—Moskva—Toshkent yo‘nalishlarida charter reyslar amalga oshirilishi belgilangan.

Bundan tashqari, 4-iyun kuni Toshkent—Sankt-Peterburg—Toshkent yo‘nalishida charter reys amalga oshiriladi.

Avval tasdiqlangan charter reyslar jadvaliga muvofiq, 25—31-may kunlari 8 ta qatnov amalga oshirilgan hamda Rossiya va Turkiyadan jami 2118 nafar fuqaro O‘zbekistonga olib kelinishi xabar qilingandi. 13-maydan 24-maygacha xorijdagi o‘zbekistonliklarni olib kelish uchun 12 ta reys amalga oshirish belgilangan va rejaga asosan amalga oshirilgandi.

Shavkat Mirziyoyev raisligida 26-may kuni bo‘lib o‘tgan yig‘ilishda chet eldan olib kelingan O‘zbekiston fuqarolari soni 47 ming nafarni tashkil etayotgani ma’lum qilingandi. Keyingi 10 kunda esa 3,5 ming odam havo yo‘llari, 7 mingga yaqin vatandosh esa chegara postlari orqali O‘zbekistonga kelishi kutilayotgani bildirilgandi. Shuningdek, 100 mingdan ortiq fuqaro O‘zbekistonga qaytish istagini bildirib, navbat kutayotgani aytilgandi.