Shahzoda Garri va Megan Markl uyi ustidan tez-tez uchayotgan dronlar tufayli kuniga 8 ming dollar evaziga qo‘riqchi yolladi

Britaniyadan Kaliforniyaga ko‘chib kelgan shahzoda Garri va Megan Markl tan soqchi yollashga majbur bo‘ldi, deb yozadi Daily Mail.

Ushbu xizmat qirollik oilasining sobiq a’zolariga kuniga yetti ming funt sterling yoki sakkiz ming dollarga tushadi.

Soqchilarni saralab olish bilan AQShning sobiq prezidenti Ronald Reyganning xavfsizlik xizmati boshlig‘i Gevin de Bekker shug‘ullandi.

Garri va Megan hozirda yashayotgan uylari ustidan eksklyuziv suratlar olish istagidagi dronlar uchib o‘ta boshlaganidan so‘ng qo‘riqchilar shtatini kuchaytirish haqida o‘ylay boshladi.

Qayd etilishicha, Bekkerning qo‘riqchilarni taqdim etuvchi kompaniyasi xizmatlaridan Madonna, Jennifer Lourens, Sher, Tom Xenks, Barbara Streyzand kabi mashhurlar foydalanadi.

“Garri va Megan de Bekkerning firmasiga to‘liq ishonadi. Bu Los-Anjelesdagi eng nufuzli va ishonchli qo‘riqlash xizmati agentligidir. Biroq ular bu xizmat uchun katta pul to‘lashiga to‘g‘ri keladi”, — deydi oilaga yaqin insonlardan biri.

Xavfsizlik uchun pulni kim to‘lashi noma’lum, biroq Garri va Meganning do‘stlari ular soqchilarini o‘z cho‘ntagidan yollayotganini aytgan.

Er-xotin hozirda amerikalik aktyor, rejissor va tadbirkor Tayler Perrining Los-Anjelesdagi uyida yashamoqda.