Italiyaning “Breshiya” klubi prezidenti Massimo Chellini 20 yoshli yarim himoyachi Sandro Tonaliga Yevropaning turli klublari qiziqayotgani haqida gapirdi.
“Tonalining o‘z maqsadlari, ambitsiyalari va oilasi bor, u uchun onasi muhim rol o‘ynaydi. PSJ prezidenti Sandroning Parijda o‘ynashini xohlayapti. U bugun ham menga bu haqida xabar jo‘natdi, ammo Tonali Fransiyaga borishni istamayapti. U “Inter” yoki “Yuventus”ga o‘tishni afzal ko‘radi.
Avvalroq “Napoli” prezidenti 40 million yevro taklif qilgandi, hozirda esa “Fiorentina” taklif bilan chiqmoqchi. Koronavirus pandemiyasidan oldin “Barselona” 65 million yevro va har biri 7,5 million yevrolik ikkita futbolchisini taklif qilgandi, ulardan biri qanot himoyachisi edi. O‘ylashimcha, katalon klubi rahbarlari o‘zlariga yoqmagan javobni olishgan, lekin Tonalidan emas.
Sandro to‘pni ko‘rishi bilan chaqnab ketadigan bola kabidir. U maydonda o‘ziga xos ishlar qiladi. U qisqa va uzoq masofalarga beradigan aniq paslari bilan ajralib turadi. Tonali yarim himoyaning istalgan nuqtasida o‘ynay oladi.
Tonalining insoniy fazilatlariga kelsak, u jamoa uchun o‘zini qurbon qiladiganlar toifasidan. Chempionat to‘xtatilguniga qadar, u mendan jarohat olganini yashirgan ekan, albatta, bu bilan jamoaga yordam berishni xohlagan. Buni bilgach esa, biz uni kuch bilan to‘xtatishga majbur bo‘ldik”, — deydi Chelleni.
Mavzuga doir: “Manchester Siti” “yangi Pirlo” uchun kurashga qo‘shildi
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)