Oliy va o‘rta maxsus ta’lim vazirligi “Angren shahrida Kukmin universitetining faoliyatini tashkil etish to‘g‘risida”gi Vazirlar Mahkamasi qarori loyihasini muhokamaga qo‘ydi.
Unga ko‘ra, Angren shahar hokimligi, Oliy va o‘rta maxsus ta’lim vazirligi hamda Janubiy Koreya Kukmin universiteti KBFBSI va G-global star group investorlar guruhining (Janubiy Koreya) oliy ta’lim sohasida ta’lim xizmatlari ko‘rsatish uchun Angren shahrida Kukmin universitetini tashkil etish to‘g‘risidagi taklifiga rozilik beriladi.
Universitetda ta’sischilar ulushi Kukmin universiteti KBFBSI – 55 foiz, G-global star group – 45 foiz ekanligi inobatga olinadi.
Universitetning huquq va majburiyatlari bo‘yicha yuqori turuvchi tashkilot Janubiy Koreya Kukmin universiteti KBFBSI bo‘lib, universitetga qabul parametrlari Oliy va o‘rta maxsus ta’lim vazirligi bilan kelishilgan holda Kukmin universiteti KBFBSI tomonidan tasdiqlanishi belgilab qo‘yiladi.
Quyidagilar universitetning asosiy vazifalari va faoliyat yo‘nalishlari etib belgilanishi inobatga olinadi:
- Toshkent viloyatining ijtimoiy-iqtisodiyot rivojlanish istiqbollarini inobatga olgan holda tadbirkorlik va boshqaruv, ijtimoiy-iqtisodiy hamda mehnat bozorida ehtiyoj yuqori bo‘lgan sohalar bo‘yicha yuqori malakali kadrlarni xalqaro standartlarga muvofiq sifatli tayyorlash;
- o‘quv va ilmiy loyihalarni amalga oshirishda, shuningdek, ilm-fan, ishlab chiqarish va amaliyot oldida turgan dolzarb vazifalarni hal etishga yo‘naltirilgan ilmiy-amaliy tadqiqotlar olib borishda respublika va xorijiy yetakchi oliy ta’lim va ilmiy-tadqiqot muassasalari bilan hamkorlik qilish;
- o‘quv jarayoniga xorijiy oliy ta’lim va ilmiy tadqiqot muassasalaridan yuqori malakali professor-o‘qituvchilar hamda mutaxassislarning jalb etilishini ta’minlash;
- respublika va xorijiy davlatlar kadrlarining malakasini oshirish, ilg‘or xorijiy ilmiy-tadqiqot muassasalari bilan hamkorlik qilish asosida tajriba almashish dasturlarini amalga oshirish;
- ta’lim jarayoniga ilg‘or pedagogik va axborot texnologiyalari, fan va texnikaning eng so‘nggi yutuqlarini joriy etish.
Angren shahar hokimligi, Xalq ta’limi vazirligi bir oy muddatda Toshkent viloyati, Angren shahri, 5/4 daha “Yoshlik” mahallasida joylashgan 1-son umumiy o‘rta ta’lim muassasasi (sobiq Angren turizm va mehmonxona xo‘jaligi kasb-hunar kolleji) bino va inshootlari tegishli hududi bilan birga uzoq muddatli maqsadli foydalanish huquqi bilan universitetga berilishini ta’minlaydi.
Fevral oyining oxirlarida Angren shahrida Kukmin universitetini ochish bo‘yicha dastlabki kelishuv imzolangani haqida xabar berilgandi. Janubiy Koreyaning mazkur oliy ta’lim muassasasiga 1946-yilda asos solingan bo‘lib, bugungi kunda uning tarkibida 15 ta fakultet faoliyat yuritib kelmoqda.
Izoh (0)