Argentina terma jamoasi va “Manchester Siti” klubi hujumchisi Serxio Kun Aguero 2-iyun kuni 32 yoshni qarshi oldi.
Faoliyati davom etayotgan bo‘lsa-da, Aguero allaqachon “Manchester Siti” afsonasiga aylangan. Futbolchi Argentinaning “Independyente” klubi tarbiyalanuvchisi hisoblanadi.
Aguero 2003-yildan “Independyente” asosiy jamoasida harakat qila boshlaydi. Iqtidor egasi argentinaliklar klubida ko‘p qolib ketmaydi va 2006-yilda Madridning “Atletiko”si safiga kelib qo‘shiladi. U yerda 2011-yilga qadar to‘p surgan forvard keyinchalik APLga ko‘chib o‘tadi. “Manchester Siti”dagi ilk mavsumidayoq asosiy tarkib futbolchisiga aylangan Aguero shu vaqtga qadar “shaharliklar” safida 368 o‘yin o‘tkazib, 254 ta gol urishga erishdi.
Kun Aguero to‘rt bor Premyer Liga chempionligi, besh marta Angliya Liga Kubogi, uch bora mamlakat Superkubogi va bir marta Angliya Kubogiga ega chiqdi. Bir necha bor APLda mavsum to‘purari bo‘ldi va qator rekordlar qayd etdi.
Quyida argentinalik yulduzning Angliya chempionatidagi eng chiroyli va muhim gollarini tomosha qiling:
2016/17-yilgi mavsum | “Vest Bromvich” — “Manchester Siti” 0:4
10-tur doirasidagi bahsda Aguero va Ilkay Gundo‘g‘anning dubllari “shaharliklar”ga g‘alaba keltirgandi. Agueroning ikkinchi goli esa shunchaki shedevrga aylangandi.
2015/16 | “Manchester Siti” — “Liverpul” 1:4
“Siti” mazkur o‘yinda yirik hisobda mag‘lub bo‘ladi, biroq Agueroning chiroyli goli mankunianlarga oz bo‘lsa-da tasalli bergandi.
2011/12 | “Norvich” — “Manchester Siti” 1:6
Liga tarixidagi eng yaxshi mavsumlar qatoridan joy olgan 2011/12-yilgi mavsum yakunlab borayotgan bir vaqtda “Siti” mehmonda haqiqiy spektakl ijro etgandi. Argentinaliklarning benefisiga aylangan uchrashuvda qahramonimiz dubl qayd etadi, uning vatandoshi Karlos Teves esa het-trikka erishadi. Shuningdek, Tevesning ushbu goldagi xizmatlari ham beqiyos.
2018/19 | “Manchester Siti” — “Chelsi” 6:0
Mauritsio Sarrining “Chelsi”dagi kursisini qimirlatib qo‘ygan bahsda Aguero uchta golni o‘z hisobiga yozdirib qo‘ygandi. Uning mana bu zarbasi oldida Kepa Arrisabalaga hech narsa qila olmagandi.
2018/19 | “Manchester Siti” — “Liverpul” 2:1
2019-yilning ilk uchrashuvida “Siti” musobaqa jadvalida ancha oldinlab ketgan “Liverpul”ni mag‘lub etadi va chempionlik poygasida umidni saqlab qoladi. Ushbu uchrashuvdan keyin Aguero jamoadoshlari faqat bir marta mag‘lub bo‘ladi va qolgan barcha o‘yinlarda g‘olib chiqqan holda chempionlikni qo‘lga kiritadi. 97 ochko to‘plagan Yurgen Klopp jamoasi esa 1 ochko farq bilan sovrindan quruq qoladi.
2012/13 | “Manchester Yunayted” — “Manchester Siti” 1:2
Serxio derbida “Manchester Yunayted” himoyasini sochib tashlagan holda gol uradi. 78-daqiqadagi mazkur gol mehmonlarga g‘alabani olib keladi.
2014/15 | KPR — “Manchester Siti” 2:2
Aguero to‘pni ajoyib tarzda o‘ziga o‘nglab olgan holda chiroyli gol muallifiga aylangandi. Uning dubliga qaramasdan “Manchester Siti” ushbu bahsda g‘alabani ushlab qololmagandi.
2015/16 | “Manchester Siti” — “Chelsi” 3:0
Serxio Yaya Ture bilan “devor” usulini qo‘llab, londonliklar himoyasini dog‘la qoldirgan holda darvozaning pastki burchagini aniq nishonga olgandi.
2018/19 | “Manchester Siti” — “Manchester Yunayted” 3:1
Bunisida esa Gundo‘g‘an bilan tashkil etilgan ajoyib kombinatsiyadan keyin David De Xea ojiz qoldirilgan.
2011/12 | “Manchester Siti” — KPR 3:2
Yuqorida tilga olganimiz APL “Oltin mavsumi”ning kulminatsiyasi!
So‘nggi tur, ikki Manchester klublarining ochkolari teng, “shaharliklar” faqat to‘plar nisbati bo‘yicha oldinda. 92-daqiqaga qadar 1:2 hisobida ortda borayotgan “Siti” Edin Jekoning golidan so‘ng hisobni tenglashtiradi. 90+4-daqiqada Aguero, ehtimol, faoliyatidagi eng muhim golni uradi va jamoasiga chempionlikni olib keladi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)