Buxoro viloyati hududlarida COVID-19 koronavirus infeksiyasining tarqalishiga qarshi kurashish doirasidagi karantin choralari qat’iylashtirildi. Ayrim hududlarda maxsus stiker bilan shaxsiy avtomobil boshqarish tartibi joriy qilindi. Bu haqda viloyat hokimligi matbuot xizmati xabar bermoqda.
Xabarga ko‘ra, Buxoro viloyatida koronavirus infeksiyasining tarqalishini oldini olish borasida ko‘rilayotgan chora-tadbirlar hamda aholining sanitariya-epidemiologik osoyishtaligini ta’minlash maqsadida 2020-yil 2-iyun kunidan boshlab noma’lum muddatgacha:
- Shofirkon hamda G‘ijduvon tumanlari ichida shaxsiy avtotransport vositalari (yuk tashuvchi, qishloq xo‘jaligida jalb qilingan hamda maxsus ruxsatnoma (stiker)li avtotransport vositalari bundan mustasno) harakatlanishi to‘xtatiladi;
- Buxoro shahri hududiga boshqa shahar va tumanlardan shaxsiy avtotransport vositalari (yuk tashuvchi, qishloq xo‘jaligida jalb qilingan hamda maxsus ruxsatnoma (stiker)li avtotransport vositalari bundan mustasno) faqatgina kunning muayyan vaqtida ( soat 07:00 dan 10:00 gacha hamda 17:00 dan 20:00 gacha) kirib-chiqishiga ruxsat beriladi;
- viloyat hududida soat 22:00 dan 06:00 gacha shaxsiy avtotransport vositalarining zaruratsiz (ish yuzasidan, oziq-ovqat mahsulotlari, dori-darmon vositalariga bo‘lgan ehtiyoj va shunga o‘xshash zarur hollar bundan mustasno) harakatlanishi cheklanadi;
- Navoiy viloyatining chegaradosh hududlari orqali fuqarolar va transport vositalarining kirib-chiqishi qat’iy karantin talablari asosida amalga oshiriladi;
- Olot tumanidagi “Olot” bojxona chegara posti, G‘ijduvon tumanidagi “Sarmijon” muntazam yo‘l-patrul xizmati maskani, Romitan tumanidagi “Qizilqum” blokposti hamda Qorovulbozor tumanidagi “Shirinbuloq” muntazam yo‘l-patrul xizmati maskanlari orqali viloyat hududiga kirib kelayotgan xalqaro yuk tashuvchi mahalliy haydovchilar (Buxoro viloyatida doimiy ro‘yxatdan o‘tgan) mazkur postlarning o‘zida belgilangan tartibda karantinga olinadi;
- Respublika maxsus komissiyasining bayoniga asosan, belgilangan tartibda yo‘nalishsiz taksi faoliyatida yo‘lovchi tashish uchun avtotransport vositasi salonida haydovchi o‘rindig‘i yo‘lovchilar o‘rindig‘idan shaffof plastik yoki maxsus plyonka bilan to‘silgan bo‘lishi, haydovchi va yo‘lovchi tibbiy niqobda bo‘lishi (tibbiy niqobsiz yo‘lovchini tashish taqiqlanadi), yo‘lovchilarning avtotransport vositasi saloni orqa o‘rindig‘iga o‘tkazilishi hamda faqat o‘z (avtotransport vositasi davlat ro‘yxatidan o‘tkazilgan) hududida harakatlanishiga ruxsat beriladi;
- sartaroshxona va go‘zallik salonlarida xizmat ko‘rsatuvchi shaxslar tomonidan shaxsiy himoya vositalari — tibbiy xalat yoki kombenezon, tibbiy niqob (N 95 yoki ustma-ust 2 ta oddiy niqob) va tibbiy qo‘lqopdan foydalangan holda “1 ta xizmat ko‘rsatuvchi shaxs — 1 ta mijoz” tamoyili asosida ijtimoiy masofani saqlagan holda faoliyat yuritishiga ruxsat beriladi;
- park va istirohat bog‘larida (attraksionlar, ko‘ngilochar obyektlar hamda tezkor ovqat tayyorlash nuqtalari faoliyati bundan mustasno) aholini belgilangan karantin talablariga qat’iy rioya qilgan holda soat 09:00 dan 20:00 ga qadar kunning muayyan vaqtida 2 nafar shaxsdan ko‘p bo‘lmagan guruhlarda (oilaviy guruhlar bundan mustasno) sayr qilishlariga ruxsat beriladi.
Sirdaryoda aholi orasida koronavirus aniqlanganidan keyin 1-iyun soat 17:00 holatiga ko‘ra, O‘zbekistonda COVID-19 bilan kasallanganlar soni 3673 nafarga yetgan.