AQSh prezidenti Donald Tramp mamlakat hukumati politsiyaning harakatlari oqibatida halok bo‘lgan afroamerikalik Jorj Floydning o‘limi sabab yuzaga kelgan zo‘ravonlik va tartibsizlikni to‘xtatishini ma’lum qildi. Mamlakat rahbarining Oq uydagi chiqishi Twitter’dagi sahifasida e’lon qilingan.
“Mening administratsiyam doim shafqatsizlik, qirg‘in va tartibsizlikka qarshi bo‘ladi”, — deydi Tramp. Uning ta’kidlashicha, hukumat “jinoyatchi va johil odamlardan iborat kichik guruhning” shaharlarni vayron qilishiga yo‘l qo‘ymaydi. “Anarxiya bo‘lmaydi”, — deydi prezident.
Trampning ta’kidlashicha, hukumat tartib va xavfsizlikka intiladigan qonunga bo‘ysunuvchi fuqarolarni qo‘llab-quvvatlaydi. Biroq tartibsizliklarning “tinchlik va adolat bilan hech qanday bog‘liqligi yo‘q”, deydi prezident. U sodir bo‘layotgan mazkur voqealarda radikal so‘lchilarni aybladi.
Mamlakat rahbari Adliya vazirligidan Floydning o‘limi borasidagi tergovni tezlashtirishni so‘rashga va’da bergan. Shuningdek, u marhumning yaqinlari bilan suhbatlashgani va ularga hamdardlik bildirganini ma’lum qildi.
AQShda ommaviy tartibsizliklar afroamerikalik Jorj Floydning politsiya tomonidan qo‘lga olingach, vafot etganidan so‘ng sodir bo‘ldi. U soxta hujjatlardan foydalanishda gumonlangan. Hodisa guvohi politsiya ofitserlaridan biri Floydni qo‘lga olish vaqtida uning bo‘ynini tizzasi bilan bosayotgani, gumonlanuvchi nafas olishga qiynalayotganini aytsa ham bunga e’tibor bermaganini videoga olgan.
Izoh (0)