Ko‘pchilik koronavirus pandemiyasiga qadar Xitoyning Uxan shahri haqida hech narsa bilmasdi. 2020-yildan keyin ushbu megapolisni dunyodagi har bir inson odatiy hayot tarzini o‘zgartirib yuborgan, odamlarni uyda o‘tirishga majbur qilgan, dunyo iqtisodiyotini to‘xtatib qo‘ygan kasallik manbasi sifatida eslab qoladi.
Fotograf Fergus Koyl o‘zining “Uxan bo‘ylab sayr” loyihasi doirasida ushbu shaharga qo‘rquv va xavotirsiz, odamlar sevib qolib, turmush quradigan, sayr qiladigan, bir so‘z bilan aytganda, hamma qatori hayot kechiradigan dunyoning bir bo‘lagiga qaragandek nazar solishga undaydi.
“Uxanning geografiyasi meni ilhomlantirdi. Shahar Yanszi va Xanshuy daryolari kesishadigan joyda joylashgan. U yerda yashagan paytim muntazam ravishda Uchan tumanida paromga o‘tirib, Yanszining shimoliy qirg‘og‘idagi Hankou Bund bog‘iga yetib olardim. Suvda suzuvchilar suzib yurardi, ular yaqinida yirik yuk kemalari ko‘zga tashlanardi”, — deya xotirlaydi fotograf.
Hankou Bund parki Yanszi daryosiga parallel ravishda to‘rt kilometr maydonda joylashgan. Mahalliy aholi bu yerda sport bilan shug‘ullanadi, shaxmat o‘ynaydi, raqsga tushadi hamda Xitoydagi eng baland bino — Uxan Grinlend markazi fonida fotosessiya uyushtiradi. Osmono‘par ushbu bino balandligi 475,6 metr bo‘lib, u balandligi bo‘yicha dunyoda to‘rtinchi o‘rinda turadi.
“Mahalliy aholi qush shaklidagi varraklarni mahorat bilan uchirishini kuzatish — eng yoqimli holatlardan biri. Ular qushni suvga shunday yaqin olib boradiki, uzoqdan qaraganda qush o‘lja uchun suvga sho‘ng‘iyotgandek tuyuladi”, — deydi fotograf.
Uxan odatda o‘ta shovqinli shahar. Uning har bir burchagida qandaydir faollikni kuzatish mumkin. Shahar aholisi juda xushmuomala, bu yerda gastronomik madaniyat rivojlangan. Odamlar, asosan, ko‘chada ovqatlanadi.
Uxanga bir yilda milliondan ortiq sayyohlar tashrif buyuradi. Shuningdek, u mamlakatning eng yirik talabalar shaharlaridan biri hisoblanadi. Uxanda 20 dan ortiq yirik universitetlar bo‘lib, ularda ko‘plab chet ellik talabalar tahsil oladi.
“Kasallik tufayli uzoq muddat jo‘shqin hayot to‘xtab qolgan Uxanga chetdan nazar solish qayg‘uli bo‘ldi”, — deydi fotograf.
Izoh (0)