Samarqand viloyatining Bulung‘ur tumanida 27-may, chorshanba kuni odam o‘limi bilan yakunlangan yo‘l-transport hodisasi yuz berdi. Bu haqda YHXBB xabar bermoqda.

Foto: YHXBB

Hodisa soat 01:30 larda “Ulug‘bek” mahallasi hududidan o‘tuvchi M-39 avtomobil yo‘lining 1058-kilometrida sodir bo‘lgan. 1980-yilda tug‘ilgan X.T. ismli erkak boshqaruvidagi Lacetti tezligini me’yoridan oshirgan holda Samarqand—Toshkent yo‘nalishi bo‘ylab ketayotganda o‘zi bilan bir yo‘nalishda oldinda harakatlanib ketayotgan 1984-yilda tug‘ilgan M.T. ismli erkak boshqaruvidagi Damas’ning orqa o‘ng yon tomonidan urgan. So‘ng Lacetti avtomobili ag‘darilgan.

Foto: YHXBB

YTH oqibatida Lacetti yo‘lovchisi 1984-yilda tug‘ilgan X.K. ismli erkak og‘ir tan jarohati olib shifoxonada vafot etgan.

Foto: YHXBB

Mazkur YTH yuzasidan Bulung‘ur tumani IIB huzuridagi Tergov bo‘limi tomonidan Jinoyat kodeksining 266-moddasi 2-qismi (Odam o‘limiga sabab bo‘lgan transport vositalari harakati yoki ulardan foydalanish xavfsizligi qoidalarini buzish) bilan jinoyat ishi qo‘zg‘atilib, tergov harakatlari olib borilmoqda.

Eslatib o‘tamiz, 24-may kuni Samarqand viloyatining Ishtixon tumanida Matiz kanalga tushib ketishi oqibatida mashina yo‘lovchisi vafot etib, uning jasadi kanalda oqib ketgandi. 26-may kuni Toshkentda Nexia-2 va Tico to‘qnashuvi oqibatida ham yo‘lovchi vafot etgandi.